(TBILISI/BAKU)៖ នៅថ្ងៃចន្ទ ទី១១ ខែសីហា អាស៊ៃបៃហ្សង់ និងអាមេនី បានចេញផ្សាយជាសាធារណៈ នូវអត្ថបទនៃកិច្ចព្រមព្រៀងសន្តិភាព ដែលសម្របសម្រួលដោយសហរដ្ឋអាមេរិក ដោយសន្យាថានឹងគោរពបូរណភាពទឹកដីរបស់គ្នាទៅវិញទៅមក ហេីយបញ្ចប់ជម្លោះជិត ៤ទសវត្សរ៍ជាផ្លូវការ។ នេះបេីយោងតាមការចេញផ្សាយដោយទីភ្នាក់ងារសារពត៌មាន Reuters។

កិច្ចព្រមព្រៀងសន្តិភាពអាស៊ៃបៃហ្សង់-អាមេនី​ សម្រេចបានកាលពីថ្ងៃសុក្រសប្តាហ៍មុន អំឡុងពេលដែលប្រធានាធិបតីអាស៊ែបៃហ្សង់ លោក Ilham Aliyev និងនាយករដ្ឋមន្ត្រីអាមេនី លោក Nikol Pashinyan បានជួបប្រធានាធិបតីអាមេរិក លោក ដូណាល់ ត្រាំ នៅសេតវិមាន។ ខ្លឹមសារនៃកិច្ចព្រមព្រៀងមានសរសេរថា ទីក្រុង Yerevan និងទីក្រុង Baku នឹងបោះបង់ចោលនូវការទាមទារគ្រប់យ៉ាងចំពោះទឹកដីរបស់គ្នាទៅវិញទៅមក ចៀសវាងការប្រើកម្លាំងយោធា និងសន្យាគោរពច្បាប់អន្តរជាតិ។

លោក Pashinyan គូសបញ្ជាក់ថា កិច្ចព្រមព្រៀងនេះគឺជាមូលដ្ឋានគ្រឹះដ៏រឹងមាំមួយសម្រាប់ការបង្កើតសន្តិភាព ដែលអាចទុកចិត្តបាន និងយូរអង្វែង ជាលទ្ធផលដែលឆ្លុះបញ្ចាំងពីផលប្រយោជន៍ដ៏មានតុល្យភាពនៃប្រទេសទាំងពីរ។ ចំណែក លោក Aliyev បានប្រាប់អ្នកយកព័ត៌មានថា ទីក្រុង Yerevan មានកិច្ចការក្នុងស្រុកមួយចំនួនដែលត្រូវធ្វើ បន្ទាប់ពីមានកិច្ចព្រមព្រៀងសន្តិភាពនេះ។

គួរបញ្ជាក់ថា អាស៊ៃបៃហ្សង់-អាមេនី គឺជាប្រទេសជិតខាងនឹងគ្នា នៅតំបន់ Caucasus ខាងត្បូង។ ប្រទេសទាំងពីរ បានជាប់គាំងនៅក្នុងជម្លោះចាប់តាំងពីចុងទសវត្សរ៍ឆ្នាំ ១៩៨០ លេីតំបន់ Nagorno-Karabakh ដែលជាតំបន់ភ្នំនៅចុងភាគខាងត្បូងនៃជួរភ្នំ Karabakh របស់អាស៊ៃបៃហ្សង់៕