(ម៉ាឌ្រីដ)៖ អាជ្ញាធរបានឱ្យដឹងនៅថ្ងៃចន្ទសប្តាហ៍នេះថា អាកាសធាតុក្តៅ និងខ្យល់បក់ខ្លាំងបណ្តាលឱ្យការឆាបឆេះរីករាលដាល ខណៈភ្លើងឆេះព្រៃបានបំផ្លាញផ្ទះជាច្រើនខ្នង បង្ខំឱ្យមានការជម្លៀសមនុស្សរាប់រយនាក់ចេញពីតំបន់ក្បែរឧទ្យានជាតិ ដែលចុះបញ្ជីដោយអង្គការយូណេស្កូ នៅឯភាគខាងជើងប្រទេសអេស្ប៉ាញ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១២ ខែសីហា ឆ្នាំ ២០២៥។

មនុស្សប្រហែល ៨០០នាក់ត្រូវបានប្រាប់ឱ្យបោះបង់ចោលផ្ទះរបស់ពួកគេ នៅក្នុងភូមិនៃតំបន់ Castile និង Leon ជាកន្លែងដែលកំពុងមានភ្លើងឆេះព្រៃ។ អណ្តាតភ្លើងបានលេបត្របាក់អគារចំនួន ២ ខណៈប៉ូលិសបានប្រាប់ឱ្យអ្នកស្រុក រៀបចំសម្រាប់ការជម្លៀសចេញ។ ដោយសារតែផ្សែងហុយខ្លាំងពេក នាំឱ្យយន្តហោះពន្លត់អគ្គីភ័យមិនអាចដាក់ពង្រាយបាន។ ប្រធានផ្នែកបរិស្ថាននៃរដ្ឋបាលតំបន់បាននិយាយថា សីតុណ្ហភាពខ្ពស់កាលពីថ្ងៃអាទិត្យ បណ្តាលឱ្យមានភ្លើងឆេះព្រៃ យ៉ាងសន្ធោសន្ធៅ នៅជិតឧទ្យាន Las Medulas ដោយបង្ខំឱ្យក្រុមពន្លត់អគ្គីភ័យដកថយ។

គួរបញ្ជាក់ថា រលកកំដៅដ៏អូសបន្លាយក្នុងប្រទេសអេស្ប៉ាញបានបន្តកាលពីថ្ងៃចន្ទ ជាមួយនិងសីតុណ្ហភាព នៅកន្លែងខ្លះឡេីងដល់កម្រិត ៤២អង្សាសេ។ អ្នកវិទ្យាសាស្ត្រនិយាយថា រដូវក្តៅកាន់តែក្តៅ និងស្ងួតនៅតំបន់មេឌីទែរ៉ាណេ ធ្វើឱ្យវាមានហានិភ័យខ្ពស់នៃភ្លើងឆេះព្រៃ៕