(មីនស្កិ៍)៖ ក្រសួងការពារជាតិបេឡារុស បានប្រកាសថា កងទ័ពរុស្ស៉ី និងបេឡារុសគ្រោងធ្វើសមយុទ្ធជាយុទ្ធសាស្ត្ររួមគ្នា នៅក្នុងប្រទេសបេឡារុសចាប់ពីថ្ងៃទី១២ ខែកញ្ញា ដល់ថ្ងៃទី១៦ ខែកញ្ញា។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១២ ខែសីហា ឆ្នាំ ២០២៥។

ក្រសួងការពាជាតិបេឡារុស បានដកស្រង់សំដីរបស់ឧត្តមសេនីយ Valery Revenko ដែលនិយាយថា គោលបំណងនៃសមយុទ្ធគឺដើម្បីធ្វេីតេស្តសមត្ថភាពរបស់រុស្ស៉ី និងបេឡារុស ក៏ដូចជាការធានាសន្តិសុខសម្រាប់ប្រទេសទាំងពីរ និងការត្រៀមខ្លួនរបស់ពួកគេ ទប់ទល់នឹងការឈ្លានពានដែលអាចកើតមាន។

នៅក្នុងបទសម្ភាសន៍ជាមួយទស្សនាវដ្តី Time កាលពីសប្តាហ៍មុន ប្រធានាធិបតីបេឡារុស លោក Alexander Lukashenko បាននិយាយថា លោកបានសម្រេចចិត្តផ្លាស់ប្តូរទីតាំងនៃការរៀបចំសមយុទ្ធយោធារួមគ្នា ទៅឆ្ងាយពីព្រំដែនភាគខាងលិចប្រទេស ជាមួយបណ្តាប្រទេសសហភាពអឺរ៉ុប ដោយលើកឡើងពីកង្វល់ខាងសន្តិសុខពីសំណាក់ប៉ូឡូញ និងប្រទេសក្នុងតំបន់បាល់ទិក។

គួរបញ្ជាក់ថា បេឡារុស ដែលជាសម្ព័ន្ធមិត្តជិតស្និទ្ធបំផុតរបស់រុស្ស៉ី មើលឃើញថាទំនាក់ទំនងរបស់ខ្លួន ជាមួយប្រទេសជិតខាងលោកខាងលិច និងអ៊ុយក្រែនកាន់តែយ៉ាប់យ៉ឺនក្នុងរយៈពេលប៉ុន្មានឆ្នាំចុងក្រោយ បន្ទាប់ពីទីក្រុងមូស្គូប្រើប្រាស់ទឹកដីបេឡារុសជាមូលដ្ឋាន សម្រាប់ការវាយលុកលើទីក្រុងកៀវនៅដេីមដំបូងនៃសង្រ្គាមឈ្លានពាន៕