(ហ្កាហ្សា)៖ យន្តហោះ និងរថក្រោះអ៉ីស្រាអែល បានបន្តទម្លាក់គ្រាប់បែកលើតំបន់ភាគខាងកើតនៃទីក្រុងហ្កាហ្សា កាលពីយប់រំលងអធ្រាត្រ សម្លាប់មនុស្សយ៉ាងហោចណាស់ ១១នាក់ ស្របពេលដែលមេដឹកនាំក្រុមហាម៉ាស លោក Khalil Al-Hayya គ្រោងនឹងទៅដល់ទីក្រុងគែរ ដើម្បីចូលរួមកិច្ចពិភាក្សាសង្គ្រោះផែនការឈប់បាញ់ដែលគាំទ្រដោយសហរដ្ឋអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ។

កិច្ចចរចាដោយប្រយោលជុំចុងក្រោយនៅប្រទេសកាតា បានបញ្ចប់ទៅដោយភាពជាប់គាំងកាលពីចុងខែកក្កដា ដោយអ៉ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស បានផ្លាស់ប្តូរការស្តីបន្ទោសគ្នាទៅវិញទៅមក។ ចាប់តាំងពីពេលនោះមក អ៉ីស្រាអែលបានប្រកាសថា ខ្លួននឹងបើកប្រតិបត្តិការវាយលុកថ្មីមួយ និងដណ្តើមគ្រប់គ្រងទីក្រុងហ្កាហ្សា ដែលខ្លួនធ្លាប់បានដកចេញកាលពីមុន។

ផែនការរបស់នាយករដ្ឋមន្ត្រីអ៉ីស្រាអែល លោក Benjamin Netanyahu ក្នុងការបង្កើនការគ្រប់គ្រងផ្នែកយោធាលើតំបន់ហ្កាហ្សា បានបង្កឱ្យមានការរិះគន់ពីសកលលោកជុំវិញការបំផ្លិចបំផ្លាញយ៉ាងធ្ងន់ធ្ងរ និងវិបត្តិអត់ឃ្លានដែលកំពុងរីករាលដាល។ ផែនការនេះក៏បានរងការរិះគន់នៅក្នុងប្រទេសអ៉ីស្រាអែលផងដែរ ដោយអគ្គសេនាធិការយោធាបានព្រមានថា វាអាចបង្កគ្រោះថ្នាក់ដល់ចំណាប់ខ្មាំងដែលនៅរស់រានមានជីវិត និងអាចក្លាយជាអន្ទាក់មរណៈសម្រាប់ទាហានអ៉ីស្រាអែល។

គួរបញ្ជាក់ថា ក្រៅពីការវាយប្រហារនៅទីក្រុងហ្កាហ្សា ក៏មានការវាយប្រហារតាមអាកាសរបស់អ៉ីស្រាអែលទៅលើផ្ទះមួយខ្នងនៅទីក្រុង Khan Younis បានសម្លាប់មនុស្ស ៥នាក់ រួមទាំងគូស្វាមីភរិយាមួយគូ និងកូនរបស់ពួកគេផងដែរ។ យោធាអ៉ីស្រាអែលបាននិយាយថា ខ្លួនកំពុងពិនិត្យមើលរបាយការណ៍ទាំងនេះ ហើយថាកងកម្លាំងរបស់ខ្លួនបានចាត់វិធានការប្រុងប្រយ័ត្នដើម្បីកាត់បន្ថយគ្រោះថ្នាក់ដល់ជនស៊ីវិល៕