(សេអ៊ូល)៖ ការិយាល័យប្រធានាធិបតីកូរ៉េខាងត្បូង បានប្រកាសនៅថ្ងៃអង្គារថា ប្រធានាធិបតី លោក លី ចេម្យុង (Lee Jae Myung) និងប្រធានាធិបតីអាមេរិក លោក ដូណាល់ ត្រាំ នឹងរៀបចំកិច្ចប្រជុំកំពូលលើកដំបូងរបស់ពួកគេ នៅថ្ងៃទី២៥ ខែសីហា ក្នុងទីក្រុងវ៉ាស៊ីនតោន ដើម្បីពិភាក្សាអំពីការពង្រឹងសម្ព័ន្ធភាព និងភាពជាដៃគូសន្តិសុខសេដ្ឋកិច្ចរបស់ប្រទេសទាំងពីរ។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters។

អ្នកនាំពាក្យប្រធានាធិបតី លោកស្រី Kang Yu-jung បានបញ្ជាក់នៅក្នុងសន្និសីទសារព័ត៌មានមួយថា «មេដឹកនាំទាំងពីរនឹងពិភាក្សាអំពីមធ្យោបាយដើម្បីអភិវឌ្ឍសម្ព័ន្ធភាពអាមេរិក-កូរ៉េខាងត្បូង ទៅជាសម្ព័ន្ធភាពយុទ្ធសាស្ត្រគ្រប់ជ្រុងជ្រោយសម្រាប់ពេលអនាគត ដើម្បីឆ្លើយតបទៅនឹងការផ្លាស់ប្តូរបរិយាកាសសន្តិសុខ និងសេដ្ឋកិច្ចអន្តរជាតិ»។ លោកស្រីបានបន្ថែមថា កិច្ចពិភាក្សានឹងផ្តោតលើការជំរុញភាពជាដៃគូក្នុងវិស័យផលិតកម្ម រួមមាន បន្ទះឈីប (semiconductors) អាគុយ និងការសាងសង់នាវា។

គួរបញ្ជាក់ថា កិច្ចប្រជុំកំពូលនេះកើតឡើង បន្ទាប់ពីលោក ត្រាំ បានប្រកាសកាលពីថ្ងៃទី៣០ ខែកក្កដា ថាលោកបានឈានដល់កិច្ចព្រមព្រៀងពាណិជ្ជកម្មជាមួយកូរ៉េខាងត្បូង ដែលជាការតបស្នងនឹងការវិនិយោគដ៏ធំសម្បើមចំនួន ៣៥០ពាន់លានដុល្លារពីកូរ៉េខាងត្បូង ដែលលោក ត្រាំ បានអះអាងថានឹងត្រូវ «ជ្រើសរើស» ដោយរូបលោកផ្ទាល់។ ទោះជាយ៉ាងណា មន្ត្រីកូរ៉េខាងត្បូងបានផ្តល់ព័ត៌មានលម្អិតខុសៗគ្នា ហើយកិច្ចព្រមព្រៀងនេះក៏មិនទាន់ត្រូវបានចងក្រងជាលាយលក្ខណ៍អក្សរនៅឡើយដែរ។

ក្រុមអ្នកជំនាញបានព្យាករណ៍ថា បញ្ហាចំណាយលើវិស័យការពារជាតិ ត្រូវបានគេរំពឹងថានឹងក្លាយជាប្រធានបទដ៏សំខាន់មួយនៅក្នុងកិច្ចប្រជុំកំពូលខាងមុខនេះ។ លោក ត្រាំ តែងតែអះអាងជាយូរមកហើយថា កូរ៉េខាងត្បូងត្រូវតែបង់ប្រាក់បន្ថែមទៀតសម្រាប់កងទ័ពអាមេរិកប្រមាណ ២៨,៥០០នាក់ ដែលកំពុងឈរជើងនៅទីនោះ។ របាយការណ៍របស់កាសែត The Washington Post បានឱ្យដឹងថា រដ្ឋបាលលោក ត្រាំ ចង់ឱ្យទីក្រុងសេអ៊ូលបង្កើនការចំណាយលើវិស័យការពារជាតិដល់ ៣.៨% នៃ GDP របស់ខ្លួន៕