(ហ្ស៊េរុយសាឡិម)៖ នាយករដ្ឋមន្ត្រីអ៉ីស្រាអែល លោក Benjamin Netanyahu បាននិយាយថាអ៉ីស្រាអែលនឹងអនុញ្ញាតឱ្យប្រជាជនប៉ាឡេស្ទីនចាកចេញពីតំបន់ហ្កាហ្សា ខណៈយោធាអ៉ីស្រាអែល កំពុងត្រៀមបើកការវាយលុកដើម្បីឈានទៅដល់ការគ្រប់គ្រងតំបន់ហ្កាហ្សាទាំងមូល។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

នៅក្នុងបទសម្ភាសន៍ជាមួយទូរទស្សន៍អ៉ីស្រាអែល i24NEWS កាលពីថ្ងៃអង្គារ ទី១២ ខែសីហា លោក Netanyahu បានលើកឡើងថាខណៈយោធាអ៉ីស្រាអែលកំពុងត្រៀមបើកការវាយលុក ទ្រង់ទ្រាយធំក្នុងតំបន់ហ្កាហ្សា អ៉ីស្រាអែលនឹងមិនបង្ខំឱ្យប្រជាជនប៉ាឡេស្ទីនចាកចេញនោះទេ តែនឹងអនុញ្ញាតឱ្យចាកចេញប្រសិនបើពួកគេចង់។ «ផ្ដល់ឱកាសឱ្យពួកគេដើម្បីចាកចេញ ដំបូងបំផុត គឺចាកចេញពីតំបន់ប្រយុទ្ធ ឬចាកចេញពីតំបន់ហ្កាហ្សាតែម្ដង ប្រសិនបើពួកគេចង់»។ នេះជាការគូសបញ្ជាក់របស់លោក Netanyahu ដោយលើកឧទាហរណ៍នៃលំហូរជនភៀសខ្លួន អំឡុងសង្រ្គាម នៅស៊ីរី អ៊ុយក្រែន និងអាហ្វហ្កានីស្ថាន។

គួរបញ្ជាក់ថា អស់រយៈពេលរាប់សិបឆ្នាំ អ៉ីស្រាអែលបានបិទខ្ទប់តំបន់ហ្កាហ្សា ដោយគ្រប់គ្រងព្រំដែន និងមិនអនុញ្ញាតឱ្យប្រជាជនប៉ាឡេស្ទីនចាកចេញដោយងាយៗនោះទេ។ សម្រាប់ប្រជាជនប៉ាឡេស្ទីន កិច្ចប្រឹងប្រែងជាថ្មីណាមួយបង្ខំឱ្យពួកគេចាកចេញពីទឹកដីដូនតារបស់ពួកគេ គឺនឹងត្រូវបានចាត់ទុកជាព្រឹត្តិការណ៍ Nakba ឬប្រែថាជាគ្រោះមហន្តរាយដែលចង់សំដៅ លើការបណ្ដេញប្រជាជនប៉ាឡេស្ទីនអំឡុងការបង្កើតរដ្ឋអ៉ីស្រាអែលក្នុងឆ្នាំ១៩៤៨៕