(ញូវដែលី)៖ នាយករដ្ឋមន្ត្រីឥណ្ឌា លោក Narendra Modi ទំនងជានឹងជួបប្រធានាធិបតីអាមេរិក លោក ដូណាល់ ត្រាំ អំឡុងធ្វើទស្សនកិច្ចទៅកាន់សហរដ្ឋអាមេរិក នៅខែកញ្ញា ដើម្បីចូលរួមមហាសន្និបាតអង្គការសហប្រជាជាជាតិ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

Reuters​ ធ្វើសេចក្ដីរាយការណ៍បែបនេះដោយផ្អែកលើការចុះផ្សាយដោយសារព័ត៌មានឥណ្ឌា Indian Express នៅថ្ងៃពុធ ទី១៣ ខែសីហា។ តែមិនទាន់អាចធ្វើការផ្ទៀងផ្ទាត់ព័ត៌មាននេះបានភ្លាមៗ នៅឡើយទេ។ មហាសន្និបាត UN នឹងចាប់ផ្ដើមនៅថ្ងៃទី៩ ខែកញ្ញា ប៉ុន្តែកិច្ចប្រជុំប្រចាំឆ្នាំរបស់ប្រមុខរដ្ឋ និងរដ្ឋាភិបាលនឹងត្រូវធ្វើឡើងចាប់ពីថ្ងៃទី២៣ ដល់ថ្ងៃទី២៩ ខែកញ្ញា។ តាម Indian Express បើទោះជាហេតុផលនៃដំណើរទស្សនកិច្ចរបស់លោក Modi គឺដើម្បីចូលរួមមហាសន្និបាត UN ក៏ពិតមែន តែគោលដៅចម្បងមួយរបស់លោក Modi នោះគឺការរៀបចំកិច្ចចរចាជាមួយលោក ត្រាំ និងស្វែងរកដំណោះស្រាយសម្រាប់បញ្ហាពាណិជ្ជកម្ម និងពន្ធគយ ដែលកំពុងធ្វើឱ្យទំនាក់ទំនងរវាងប្រទេសទាំង២ រកាំរកូស។

គួរបញ្ជាក់ថា សេចក្ដីរាយការណ៍ពីលទ្ធភាពនៃដំណើរទស្សនកិច្ចរបស់លោក Modi ទៅកាន់សហរដ្ឋអាមេរិក កើតមានឡើងបន្ទាប់ពីលោក ត្រាំ បានប្រកាសពីការយកពន្ធគយបន្ថែម ២៥ភាគរយលើ ទំនិញនាំចូលពីឥណ្ឌា ដែលនេះធ្វើឱ្យពន្ធគយដែលឥណ្ឌាត្រូវបង់ឱ្យសហរដ្ឋអាមេរិកឡើងដល់៥០ភាគរយ។ ការដំឡើងពន្ធគយបន្ថែមនេះត្រូវបានលោក ត្រាំ អះអាងថាជាការដាក់ទណ្ឌកម្មលើឥណ្ឌា សម្រាប់ការបន្តទិញប្រេងពីរុស្ស៉ី៕