(ប៉េកាំង)៖ នៅថ្ងៃពុធ ទី១៣ ខែសីហា យោធាចិនបានប្រកាសឱ្យដឹងថា ខ្លួនបានឃ្លាំមើលនិងបណ្តេញនាវាចម្បាំងអាមេរិក ១គ្រឿង ដែលបានបើកចូលមកក្បែរតំបន់ថ្មប៉ប្រះទឹក Scarborough Shoal ដែលមានបញ្ហាវិវាទជាមួយហ្វីលីពីន នៅសមុទ្រចិនខាងត្បូង។ នេះបើតាមាករចេញផ្សាយដោយ ទីភ្នាក់ងារព័ត៌មាន Reuters។

ប្រតិបត្តិការខាងលើរបស់នាវាយោធាអាមេរិក កើតឡើងមួយថ្ងៃប៉ុណ្ណោះបន្ទាប់ពី ហ្វីលីពីនបានចោទប្រកាន់ថា នាវាចិនបានធ្វើសកម្មភាពដែលបង្កគ្រោះថ្នាក់ និងជ្រៀតជ្រែកខុសច្បាប់ អំឡុងបេសកកម្មផ្គត់ផ្គង់សម្ភាររបស់ហ្វីលីពីន នៅក្បែរតំបន់ថ្មប៉ប្រះទឹក Scarborough។

យោធាចិនបាននិយាយថា នាវាចម្បាំងអាមេរិក USS Higgins បានបើកចូលដែនទឹកនៅតំបន់ខាងលើ ដោយគ្មានការអនុញ្ញាត​ពីរដ្ឋាភិបាលចិន នាថ្ងៃពុធនេះ ខណៈវាជាទង្វើបំពានធ្ងន់ធ្ងរចំពោះអធិបតេយ្យនិងសន្តិសុខរបស់ចិន ហើយប៉ះពាល់ដល់សន្តិភាព និងស្ថិរភាពនៅសមុទ្រចិនខាងត្បូង។ ដោយឡែក ខាងកងទ័ពជើងទឹកអាមេរិក បានឆ្លើយតបថា នាវា Higgins បានអនុវត្តសិទ្ធិ​និងសេរីភាពនៃការធ្វើនាវាចរណ៍របស់ខ្លួន នៅក្បែរតំបន់ Scarborough Shoal ស្របតាមច្បាប់អន្តរជាតិ។

គួរបញ្ជាក់ថា បើតាមការអះអាងរបស់ទីក្រុងម៉ានីល អំឡុងឧប្បត្តិហេតុក្នុងសប្តាហ៍នេះ នាវាចិន២គ្រឿង ក៏បានប៉ះទង្គិចគ្នាផងដែរ។ តំបន់ Scarborough Shoal គឺជាប្រភពចម្បងមួយនៃភាពតានតឹង នៅសមុទ្រចិនខាងត្បូង ជាច្រកផ្លូវទឹកដែលទំនិញគិតជាទឹកប្រាក់ ​សរុបច្រើនជាង៣ពាន់លានដុល្លារ ត្រូវបានដឹកជញ្ជូនឆ្លងកាត់តាមកប៉ាល់ ជារៀងរាល់ឆ្នាំ៕