(ព្រុចសែល)៖ ក្នុងលិខិតរួមមួយ ចក្រភពអង់គ្លេស បារាំង និងអាល្លឺម៉ង់ បានប្រាប់ទៅកាន់អង្គការសហប្រជាជាតិ (UN) ថា ពួកគេត្រៀមលក្ខណៈរួចជាស្រេច ដើម្បីដាក់ទណ្ឌកម្មរបស់ UN លើអ៉ីរ៉ង់ឡើងវិញ ជុំវិញកម្មវិធីនុយក្លេអ៊ែរ ប្រសិនបើមិនអាចរក​បានដំណោះស្រាយការទូត មុនដំណាច់ខែសីហានេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្នុងលិខិតផ្ញើទៅកាន់អគ្គលេខាធិការ UN លោក Antonio Guterres ក្រុមរដ្ឋមន្រ្តីការបរទេសនៃមហាអំណាចអឺរ៉ុបទាំង៣ បានលើកឡើងថា ប្រទេសរបស់ពួកគេប្តេជ្ញាប្រើប្រាស់ឧបករណ៍ការទូតទាំងអស់ដែលខ្លួនមាន ដើម្បីធានាថា អ៉ីរ៉ង់មិនអាចអភិវឌ្ឍ​អាវុធនុយក្លេអ៊ែរ លុះត្រាតែទីក្រុងតេហេរ៉ង់ អាចរកដំណោះស្រាយបានមុនថ្ងៃកំណត់។

អំឡុងអាណត្តិទី១របស់លោក ដូណាល់ ត្រាំ សហរដ្ឋអាមេរិក កាលពីឆ្នាំ២០១៨ បានដកខ្លួនចេញពីកិច្ចព្រមព្រៀងនុយក្លេអ៊ែរអ៉ីរ៉ង់ ដែលលោក បារ៉ាក់ អូបាម៉ា សម្រេចបានជាមួយទីក្រុងតេហរ៉ង់ និងមហាអំណាចពិភពលោកមួយចំនួនទៀត។ កិច្ចព្រមព្រៀងដែលនៅបន្តមានសុពលភាពនៅឡើយនេះ បានដាក់ការរិតត្បិតខ្លាំងលើ កម្មវិធីនុយក្លេអ៊ែររបស់អ៉ីរ៉ង់ ជាថ្នូរនឹងការបន្ធូរបន្ថយទណ្ឌកម្ម។

ទណ្ឌកម្មរបស់ UN នឹងត្រូវផុតសុពលភាពនៅថ្ងៃទី១៨ ខែតុលា លុះត្រាតែភាគីណាមួយ ក្នុងចំណោមភាគីនៅសល់ក្នុងកិច្ចព្រមព្រៀង គឺអង់គ្លេស អាល្លឺម៉ង់ បារាំង រុស្ស៉ី និងចិន ប្រើប្រាស់យន្តការដាក់ទណ្ឌកម្មឡើងវិញ ឬហៅថា snapback mechanism។

អំឡុងកិច្ចចរចានៅតួកគីយ៉េកាលពីខែកក្កដា មហាអំណាចអឺរ៉ុបទាំង៣ បាននិយាយថា ពួកគេអាចនឹងពន្យារថ្ងៃកំណត់ចុងខែសីហានេះ នៃការប្រើ snapback mechanism ប្រសិនបើទីក្រុងតេហរ៉ង់ យល់ព្រមបន្តការចរចាឡើងវិញចាមួយសហរដ្ឋអាមេរិក រួមទាំងកិច្ចសហប្រតិបត្តិការជាមួយ ទីភ្នាក់ងារថាមពលអន្តរជាតិ IAEA របស់ UN មុនខែកញ្ញា។

គួរបញ្ជាក់ថា កាលពីខែមិថុនា ទីក្រុងតេហរ៉ង់បានប្រកាសផ្អាកកិច្ចសហប្រតិបត្តិការជាមួយទីភ្នាក់ងារ IAEA ដែលពីមុនមកធ្លាប់មាន ក្រុមអ្នកជំនាញត្រួតពិនិត្យនៅប្រទេសអ៉ីរ៉ង់ បន្ទាប់ពីអ៉ីស្រាអែលបានធ្វើសង្រ្គាមផ្លូវអាកាសរយៈពេល១២ថ្ងៃ ប្រឆាំងអ៉ីរ៉ង់៕