(វ៉ាស៉ីនតោន)៖ រដ្ឋមន្រ្តីហិរញ្ញវត្ថុអាមេរិក លោក Scott Bessent បាននិយាយថា កិច្ចព្រមព្រៀងពាណិ្ជកម្មធំៗមួយចំនួន នៅតែស្ថិតក្នុងដំណើរការដើម្បីសម្រេច រួមទាំងស្វីស និងឥណ្ឌា ប៉ុន្តែឥណ្ឌា​ រឹងរូសបន្តិចក្នុងកិច្ចចរចាជាមួយ​សហរដ្ឋ​អាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៣ ខែសីហា ឆ្នាំ ២០២៥។

លោក Bessent បានប្រាប់កម្មវិធី Fox Business ថាលោករំពឹងថារដ្ឋបាល លោក ត្រាំ អាចបញ្ចប់ការចរចាពាណិជ្ជកម្មនានា នៅចុងខែតុលា។ លោកគូសបញ្ជាក់ថា «នោះ​គ្រាន់តែជាការ​ចង់បាន ប៉ុន្តែ​ខ្ញុំ​គិត​ថា​យើង​ស្ថិត​ក្នុង​ស្ថានភាព​ល្អ​មួយ​ហើយ។ ខ្ញុំ​គិត​ថា​ យើង​អាច​នឹង​មាន​ការ​ព្រមព្រៀង​លើ​លក្ខខណ្ឌ​សំខាន់ៗ​ ជាមួយ​ប្រទេស​ទាំងអស់​»​។

គួរបញ្ជាក់ថា កាលពីថ្ងៃទី៦ ខែសីហា ប្រធានាធិបតីអាមេរិក លោក ដូណាល់ ត្រាំ បានដាក់បទបញ្ជាប្រតិបត្តិមួយទៀត ដោយបន្ថែមពន្ធ ២៥ភាគរយទៀតលើឥណ្ឌា ដែលនាំឱ្យពន្ធសរុបលើទំនិញឥណ្ឌាកើនឡើងដល់ ៥០ភាគរយ។ សេតវិមានថា ចំណាត់ការនេះគឺផ្អែកទៅលើសន្តិសុខជាតិ និងការព្រួយបារម្ភអំពីគោលនយោបាយការបរទេស ដោយលើកហេតុផលថា ការនាំចូលប្រេងពីរុស្ស៉ីរបស់ឥណ្ឌា បង្កការគំរាមកំហែងចំពោះសហរដ្ឋអាមេរិក។ ពន្ធគយនេះ នឹងចូលជាធរមាននៅថ្ងៃទី២៧ ខែសីហា៕