(ស៉ីដនី)៖ អូស្រ្តាលី និងវ៉ានូទូ បានឯកភាពលើកិច្ចព្រមព្រៀងតម្លៃ ៣២៦.៥០លានដុល្លារអាមេរិក ដើម្បីពង្រឹងទំនាក់ទំនងសេដ្ឋកិច្ច និងសន្តិសុខ ចំពោះមុខការប្រកួតប្រជែងពីចិន ដែលជាម្ចាស់បំណុលដ៏ធំរបស់ប្រទេសកោះប៉ាស៉ីហ្វិកមួយនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៣ ខែសីហា ឆ្នាំ ២០២៥។

នាយករដ្ឋមន្រ្តីវ៉ានូទូ លោក Jotham Napat បាននិយាយថា កិច្ចព្រមព្រៀងដែលគេស្គាល់ថា Nakamal Agreement នឹងនាំឱ្យអូស្រ្តាលីវិនិយោគទុននៅវ៉ានូទូ រហូតដល់ទសវត្សរ៍ខាងមុខ ហើយនឹងប្រែក្លាយជាផលប្រយោជន៍ពាណិជ្ជកម្ម រវាងប្រទេសទាំងពីរ មិនថាជាផ្នែកសន្តិសុខ សេដ្ឋកិច្ច និងមួយចំនួនលើការផ្លាស់ប្តូរកម្លាំងពលកម្ម។

ឧបនាយករដ្ឋមន្រ្តីអូស្រ្តាលី លោក Richard Marles បាននិយាយថា កិច្ចព្រមព្រៀងនោះ សបញ្ជាក់ពីភាពជាអ្នកជិតខាង មានបរិយាកាសសន្តិសុខរួមគ្នា និងការប្តេជ្ញាចិត្តចំពោះគ្នាទៅវិញទៅមក ហើយត្រូវចុះហត្ថលេខារវាងលោក Napat និងនាយករដ្ឋមន្រ្តី លោក Anthony Albanese នៅប៉ុន្មានសប្តាហ៍ខាងមុខ។

គួរបញ្ជាក់ថា ក្នុងរយៈពេលប៉ុន្មានឆ្នាំនេះ វ៉ានូទូ កាន់តែខិតទៅរកចិន ដែលជាម្ចាស់បំណុលដ៏ធំបំផុតរបស់ខ្លួន មួយទសវត្សរ៍បន្ទាប់ពីទទួលបានប្រាក់កម្ចីសម្រាប់ការសាងសង់ហេដ្ឋារចនាសម្ព័ន្ធ រួមទាំងការិយាល័យប្រធានាធិបតីថ្មី កាលពីឆ្នាំ ២០២៤ផងដែរ៕