(ហ្កាហ្សា)៖ យោធាអ៉ីស្រាអែលបានបន្តវាយប្រហារយ៉ាងខ្លាំងក្លាលើទីក្រុងហ្កាហ្សា នៅថ្ងៃពុធនេះ ដែលជាផ្នែកមួយនៃការត្រៀមខ្លួនសម្រាប់ប្រតិបត្តិការដណ្ដើមគ្រប់គ្រង ខណៈក្រសួងសុខាភិបាលហ្កាហ្សាបានរាយការណ៍ថា មានមនុស្សចំនួន ១២៣នាក់ទៀតត្រូវបានសម្លាប់ក្នុងរយៈពេល ២៤ម៉ោងចុងក្រោយ។នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នាយករដ្ឋមន្ត្រីអ៉ីស្រាអែល លោក Benjamin Netanyahu បាននិយាយគាំទ្រគំនិតដែលលើកឡើងដោយលោក ដូណាល់ ត្រាំ ថា ប្រជាជនប៉ាឡេស្ទីនគួរតែចាកចេញពីតំបន់នេះ។ លោកបានប្រាប់ទូរទស្សន៍អ៉ីស្រាអែល i24NEWS ថា ប្រជាជនប៉ាឡេស្ទីនគួរតែចាកចេញពីតំបន់នេះ ដោយជំរុញឱ្យប្រទេសដទៃ «បើកទ្វារទទួលពួកគេ» ជាជាងមកបង្រៀនអ៉ីស្រាអែល។ គំនិតនៃការផ្លាស់ទីលំនៅរបស់ប្រជាជនហ្កាហ្សានេះ ត្រូវបានមេដឹកនាំអារ៉ាប់ និងពិភពលោកជាច្រើនចាត់ទុកថាជារឿងដ៏គួរឱ្យរន្ធត់ ហើយប្រជាជនប៉ាឡេស្ទីនប្រៀបធៀបវាទៅនឹងគ្រោះមហន្តរាយ «Nakba» ក្នុងឆ្នាំ១៩៤៨។

យោងតាមសាក្សី យន្តហោះ និងរថក្រោះអ៉ីស្រាអែលបានទម្លាក់គ្រាប់បែកយ៉ាងខ្លាំងក្លាលើតំបន់ភាគខាងកើតនៃទីក្រុងហ្កាហ្សា ដោយមន្ទីរពេទ្យ Al-Ahli បានរាយការណ៍ថា មនុស្ស ១២នាក់ត្រូវបានសម្លាប់ក្នុងការវាយប្រហារតាមអាកាសមួយលើផ្ទះមួយខ្នងនៅតំបន់ Zeitoun។ ទន្ទឹមនឹងនេះដែរ រថក្រោះក៏បានបំផ្លាញផ្ទះជាច្រើនខ្នងនៅភាគខាងកើតនៃទីក្រុង Khan Younis ខណៈដែលការបាញ់ប្រហាររបស់អ៉ីស្រាអែលបានសម្លាប់អ្នកស្វែងរកជំនួយចំនួន ៩នាក់ នៅក្នុងឧប្បត្តិហេតុពីរផ្សេងគ្នា។

គួរបញ្ជាក់ថា ក្រសួងសុខាភិបាលហ្កាហ្សាបានរាយការណ៍បន្ថែមថា មនុស្ស ៨នាក់ទៀត រួមទាំងកុមារ ៣នាក់ បានស្លាប់ដោយសារការអត់ឃ្លាន និងកង្វះអាហារូបត្ថម្ភក្នុងរយៈពេល ២៤ម៉ោងចុងក្រោយ ដែលនាំឱ្យចំនួនអ្នកស្លាប់សរុបដោយមូលហេតុនេះកើនដល់ ២៣៥នាក់។ ជាមួយគ្នានេះ កិច្ចប្រជុំរបស់ប្រធានអ្នកចរចារបស់ក្រុមហាម៉ាស លោក Khalil Al-Hayya នៅទីក្រុងគែរ គឺផ្តោតសំខាន់លើការបញ្ឈប់សង្គ្រាម ការបញ្ជូនជំនួយ និង «ការបញ្ចប់ទុក្ខលំបាករបស់ប្រជាជនយើងនៅហ្កាហ្សា»៕