(សេអ៊ូល)៖ ប្អូនស្រីបង្កើតរបស់មេដឹកនាំកូរ៉េខាងជើង លោក គីម ជុងអ៊ុន គឺលោកស្រី គីម យ៉ូជុង (Kim Yo Jong) នៅថ្ងៃព្រហស្បតិ៍ ទី១៤ ខែសីហា បាននិយាយថា កូរ៉េខាងជើងមិនបានដកឧបករណ៍បំពងសំឡេងចេញពីតំបន់ព្រំដែននោះទេ ហើយក៏នឹងមិនធ្វើដូច្នេះដែរ ភ្ជាប់ជាមួយការហៅសំណើសន្តិភាពរបស់កូរ៉េខាងត្បូងជា ការស្រមើស្រមៃ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោកស្រី គីម យ៉ូជុង ដែលជាមន្ត្រីជាន់ខ្ពស់ម្នាក់នៅក្នុងគណបក្សពលករកូរ៉េខាងជើង ក៏បានរិះគន់ដែរថាផែនការធ្វើសមយុទ្ធយោធារួមគ្នាប្រចាំឆ្នាំរវាងអាមេរិក និងកូរ៉េខាងត្បូងជាសកម្មភាពមួយបង្ហាញយ៉ាងច្បាស់ពីចេតនាអាក្រក់របស់ប្រទេសទាំង២ចំពោះកូរ៉េខាងជើង។ លោកស្រី គីម ដែលក្រុមអ្នកវិភាគជឿថាចេញមុខ និយាយជំនួសឱ្យបងប្រុសរបស់លោកស្រី កាលពីប៉ុន្មានសប្ដាហ៍កន្លងទៅនេះ តែងតែចេញមុខទាត់ចោលសំណើបន្ធូរបន្ថយភាពតានតឹងរវាងកូរ៉េទាំង២ ស្នើឡើងដោយ រដ្ឋាភិបាលកូរ៉េខាងត្បូងថ្មីរបស់លោកប្រធានាធិបតី Lee Jae Myung។

តាមរយៈការដកស្រង់សម្ដីដោយប្រព័ន្ធផ្សព្វផ្សាយរដ្ឋកូរ៉េខាងជើង KCNA​ លោកស្រី គីម បានគូសបញ្ជាក់ដូច្នេះថា «ខ្ញុំជឿជាក់ថាគោលនយោបាយរបស់កូរ៉េខាងត្បូង ចំពោះកូរ៉េខាងជើងនៅតែមិនផ្លាស់ប្ដូរ ហើយក៏នឹងមិនអាចផ្លាស់ប្ដូរនោះដែរ»។

គួរបញ្ជាក់ថា ប្រតិកម្មខាងលើរបស់លោកស្រី គីម យ៉ូជុង កើតមានឡើងបន្ទាប់ពីយោធាកូរ៉េខាងត្បូងថ្មីៗនេះបាននិយាយថាខ្លួនចាប់បានសញ្ញាថាកូរ៉េខាងជើង បានដក ឧបករណ៍បំពងសំឡេងទុកឃោសនារិះគន់កូរ៉េខាងត្បូងមួយចំនួនចេញពីបណ្ដោយព្រំដែន ក្រោយកូរ៉េខាងត្បូងបានធ្វើដូចគ្នានេះដែរ៕