(ប៉េកាំង)៖ ព្យុះត្រូពិក Podul បានបក់បោកលើភាគខាងត្បូងប្រទេសចិន នៅថ្ងៃព្រហស្បតិ៍ ទី១៤ ខែសីហា ដោយនាំមកជាមួយភ្លៀងធ្លាក់ខ្លាំងធ្វើឱ្យកម្ពស់ទឹកភ្លៀងហក់ឡើងដល់ ៧០មីលីម៉ែត្រនៅក្នុងរយៈពេលមួយម៉ោង នៅតាមផ្នែកជាច្រើននៃខេត្ត Guangdong Hunan និង Jiangxi។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

អាជ្ញាធរឧតុនិយមចិន បានឱ្យដឹងថាព្យុះ Podul បានបក់បោកលើតំបន់ឆ្នេរនៃខេត្ត Fujian ស្ថិតនៅភាគអាគ្នេយ៍នៃប្រទេស នៅ​ម៉ោង ០០៖៣០នាទីយប់ឈានចូលថ្ងៃព្រហស្បតិ៍នេះ ហើយត្រូវបានព្យាករថានឹងបក់បោកឆ្ពោះទៅទិសពាយព្យ ក្នុងល្បឿន៣០ ទៅ៣៥គីឡូម៉ែត្រក្នុងមួយម៉ោង។

គួរបញ្ជាក់ថា ព្យុះ Podul បានថមថយចុះឥទ្ធិពលពីព្យុះទីហ្វុងទៅជាព្យុះត្រូពិក បន្ទាប់ពីបក់បោកលើកោះតៃវ៉ាន់កាលពីថ្ងៃពុធ ជាទីដែលព្យុះនេះធ្វើដំណើរក្នុងល្បឿន ១៩១គីឡូម៉ែត្រ ក្នុងមួយម៉ោង ដោយបណ្ដោលឱ្យមនុស្សម្នាក់បាត់ខ្លួន និង១៤៣នាក់ផ្សេងទៀតរងរបួស។ ប៉ុន្តែ ឥទ្ធិពលសេសសល់នៃព្យុះនេះបានបង្កឱ្យមានភ្លៀងធ្លាក់ ខ្លាំងលើភាគខាងត្បូង ប្រទេសចិនដែលទើបតែពើបប្រទះនឹងគ្រោះទឹកជំនន់កាលពីសប្ដាហ៍មុន៕