(ហាណូយ)៖ ប្រភពចំនួនពីរបានប្រាប់ Reuters ថា សមាគមស្បៀងអាហារវៀតណាម បានស្នើឱ្យក្រសួងពាណិជ្ជកម្មរបស់ប្រទេស ជំទាស់នឹងចំណាត់ការផ្អាកនាំចូលអង្ករ រយៈពេលពីរខែរបស់ហ្វីលីពីន ដោយពាណិជ្ជករនិយាយថា វានឹងធ្វើឱ្យប៉ះពាល់ដល់ផលិតកម្មក្នុងស្រុក។ នេះបើយោងតាមការចេញផ្សាយនៅថ្ងៃព្រហស្បតិ៍ ទី១៤ ខែសីហា ឆ្នាំ ២០២៥។

ហ្វីលីពីន គឺជាអ្នកទិញអង្ករដ៏ធំរបស់វៀតណាម ហើយបាននិយាយកាលពីសប្តាហ៍មុនថា ខ្លួននឹងផ្អាកការនាំចូលអង្កររយៈពេល ៦០ថ្ងៃ ដោយចាប់ផ្តើមពីថ្ងៃទី១ ខែកញ្ញា នៅក្នុងកិច្ចខិតខំប្រឹងប្រែងការពារកសិករក្នុងស្រុក ពីផលប៉ះពាល់នៃតម្លៃចុះថោក អំឡុងរដូវច្រូតកាត់។

ពាណិជ្ជករម្នាក់នៅទីក្រុងហូជីមិញ និយាយថា «ពួកគេ (ហ្វីលីពីន) កំពុងផ្អាកការនាំចូលអង្ករនៅឆ្នាំនេះ ដើម្បីការពារកសិកររបស់ពួកគេ នៅមុនការប្រមូលផល»។ ប្រភពមួយទៀតនិយាយថា ការផ្អាករបៀបនេះនឹងប៉ះពាល់ខ្លាំង ដល់ផលិតកម្មស្រូវអង្ករវៀតណាម។ ដោយឡែក ខាងសមាគម និងក្រសួងឧស្សាហកម្ម និងពាណិជ្ជកម្មវៀតណាម មិនទាន់ឆ្លើយតបចំពោះសំណើសុំការផ្ទៀងផ្ទាត់ពី Reuters នៅឡើយទេ។

គួរបញ្ជាក់ថា យោងតាមទិន្នន័យរបស់គយ វៀតណាមបាននាំចេញអង្ករចំនួន ២.៤៤លានតោនទៅកាន់ហ្វីលីពីន ក្នុងរយៈពេល ៧ខែដំបូងនៃឆ្នាំនេះ ដែលស្មើនឹង ៤៤.៣ភាគរយនៃការនាំចេញអង្ករសរុបក្នុងរយៈពេលនេះ៕