(ម៉ានីល)៖ រដ្ឋាភិបាលហ្វីលីពីន បានអះអាងថា កាលពីថ្ងៃពុធ ទី១៣ ខែសីហា យន្តហោះចម្បាំងចិន១គ្រឿង បានហោះមកស្ទាក់ យន្តហោះហ្វីលីពីនដែលមានដឹកក្រុមអ្នកកាសែត អំឡុងពេលហោះហើរល្បាត នៅលើតំបន់ថ្មប៉ប្រះទឹក Scarborough Shoal ដែលមានបញ្ហាវិវាទនៅសមុទ្រចិនខាងត្បូង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

វាគឺជាសញ្ញាថ្មីចុងក្រោយនៃភាពតានតឹង ដែលនៅតែបន្តរវាងប្រទេសហ្វីលីពីននិងចិន ក្នុងតំបន់សមុទ្រចិនខាងត្បូង។ ក្នុងថ្ងៃជាមួយគ្នា នាវាចម្បាំងអាមេរិក២គ្រឿង រួមមាន USS Cincinnati និង USS Higgins ក៏ត្រូវបានប្រទះឃើញស្ថិតនៅចម្ងាយខ្ទង់ជាង៥០គីឡូម៉ែត្រ​ពី Scarborough Shoal ផងដែរ។ យោធាចិនបានអះអាងថា ខ្លួនបានបណ្តេញនាវា USS Higgins ចេញទៅវិញ បន្ទាប់ពីវាបានបើកចូលក្បែរតំបន់ថ្មប៉ប្រះទឹកនោះ ដោយគ្មានការអនុញ្ញាត ប៉ុន្តែកងទ័ពជើងទឹកអាមេរិក បាននិយាយថា នាវារបស់ខ្លួន អនុវត្តប្រតិបត្តិការសេរីភាពនៃការធ្វើនាវាចរណ៍ ដោយស្របតាមច្បាប់អន្តរជាតិ។

គួរបញ្ជាក់ថា កាលពីថ្ងៃចន្ទដើមសប្តាហ៍នេះ កងឆ្មាំសមុទ្រហ្វីលីពីន បានបញ្ជូនទូកប៉ុន្មានគ្រឿង បំពេញបេសកកម្មផ្គត់ផ្គង់សម្ភារ​ទៅកាន់តំបន់ថ្មប៉ប្រះទឹក Scarborough Shoal ប៉ុន្តែទីក្រុងម៉ានីលបានអះអាងថា ក្រុមនាវារបស់ចិនបានធ្វើសកម្មភាពយ៉ាងគ្រោះថ្នាក់ ដើម្បីព្យាយាមរារាំងប្រតិបត្តិការរបស់ខ្លួន ជាហេតុបណ្តាលឱ្យនាវាចិន២គ្រឿងបុកគ្នា។ បញ្ហាអធិបតេយ្យលើតំបន់ Scarborough Shoal នៅមិនទាន់ដោះស្រាយដាច់ស្រេចឡើយ ប៉ុន្តែចិនបានរក្សាវត្តមានជាប់នៅទីនោះ ចាប់តាំងតែពីឆ្នាំ២០១២មក៕