(សេអ៊ូល)៖ កាលពីថ្ងៃពុធ ទី១៣ ខែសីហា ការិយាល័យប្រធានាធិបតីនៃប្រទេសកូរ៉េខាងត្បូង បានឱ្យដឹងថា ប្រធានាធិបតី លោក Lee Jae Myung នឹងទៅបំពេញទស្សនកិច្ចនៅប្រទេសជប៉ុន ពីថ្ងៃទី២៣ ដល់ទី២៤ ខែសីហា ហើយបើកកិច្ចប្រជុំកំពូលទ្វេភាគី ជាមួយនាយករដ្ឋមន្រ្តី លោក Shigeru Ishiba។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

អ្នកនាំពាក្យប្រធានាធិបតីកូរ៉េខាងត្បូង បាននិយាយថា មេដឹកនាំទាំងពីរនឹងពិភាក្សាគ្នា អំពីមធ្យោបាយដើម្បីពង្រឹងសន្តិភាពក្នុងតំបន់ និងជំរុញកិច្ចសហប្រតិបត្តិការត្រីភាគី ជាមួយទីក្រុងវ៉ាស៉ីនតោន។ លោក Lee កាលពីមុន ធ្លាប់រិះគន់កិច្ចប្រឹងប្រែងរបស់ទីក្រុងសេអ៊ូល ដែលសំដៅចង់ធ្វើឱ្យចំណងទាក់ទងប្រសើរឡើងជាមួយទីក្រុងតូក្យូ ប៉ុន្តែនៅពេលដែលលោកបានជួបលោក Ishiba ក្នុងជំនួបកំពូលលើកដំបូង អំឡុងព្រឹត្តិការណ៍កិច្ចប្រជុំ G7 នៅប្រទេសកាណាដា កាលពីមិថុនា អ្នកទាំងពីរបានប្តេជ្ញារួមគ្នាថា នឹងធ្វើឱ្យទំនាក់ទំនងមានភាពស៉ីជម្រៅ។

គួរបញ្ជាក់ថា ទំនាក់ទំនងរវាងប្រទេសទាំងពីរ ដែលសុទ្ធតែជាសម្ព័ន្ធមិត្តរបស់សហរដ្ឋអាមេរិក គឺមានភាពល្អក់កករដោយសារតែ​បញ្ហាវិវាទប្រវត្តិសាស្រ្ត បន្សល់ទុកមកតាំងពីសម័យអាណានិគមជប៉ុន នៅឧបទ្វីបកូរ៉េឆ្នាំ១៩១០-១៩៤៥។ ទស្សនកិច្ចរបស់លោក Lee ទៅកាន់ជប៉ុន គឺកើតមានឡើង មុនដំណើរទស្សនកិច្ចរបស់លោក ទៅកាន់សហរដ្ឋអាមេរិក ជាទីដែលលោក Lee នឹងត្រូវបើកកិច្ចប្រជុំជាមួយប្រធានាធិបតី ដូណាល់ ត្រាំ នាថ្ងៃទី២៥ ខែសីហា៕