(វ៉ាសូវី)៖ រដ្ឋមន្រ្តីការពារជាតិនៃប្រទេសប៉ូឡូញ កាលពីថ្ងៃពុធ ទី១៣ ខែសីហា បានឱ្យដឹងថា ប៉ូឡូញបានចុះកិច្ចព្រមព្រៀងមួយទំហំ ៣.៨ពាន់លានដុល្លារ ដើម្បីធ្វើទំនើបកម្មលើកងយន្តហោះចម្បាំង F-16 របស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

សព្វថ្ងៃប្រទេសអឺរ៉ុបមួយនេះ មានយន្តហោះចម្បាំង F-16 ស៊េរី C/D Block 52+ សរុប៤៨គ្រឿង ដែលទទួលបានកាលពីចន្លោះ​ឆ្នាំ២០០៦ និងឆ្នាំ២០០៨។ រដ្ឋមន្រ្តីការពារជាតិប៉ូឡូញ លោក Wladysław Kosiniak-Kamysz បាននិយាយក្នុងសន្និសីទសារព័ត៌មានមួយថា សមត្ថភាពបច្ចុប្បន្នរបស់យន្តហោះចម្បាំង F-16 ស៊េរី CD គឺល្អហើយ ប៉ុន្តែក្រោយរយៈពេល ២០ឆ្នាំកន្លងផុតទៅ គឺវាមិនគ្រប់គ្រាន់ទេដើម្បីប្រឆាំងការគំរាមកំហែង។

គួរបញ្ជាក់ថា ប៉ូឡូញបាននិងកំពុងបង្កើនការចំណាយលើវិស័យយោធារបស់ខ្លួន ចាប់តាំងតែពីសង្រ្គាមឈ្លានពានរបស់រុស្ស៉ីនៅអ៊ុយក្រែន បានផ្ទុះឡើងមក ហើយគ្រោងនឹងចំណាយដល់ ៥ភាគរយនៃ GDP របស់ប្រទេស ទៅលើកងកម្លាំងយោធា នៅឆ្នាំ២០២៦។ កាលពីដើមខែសីហានេះ ប៉ូឡូញទើបតែបានចុះកិច្ចព្រមព្រៀងខ្ទង់ពាន់លានដុល្លារ ដើម្បីទិញរថក្រោះចំនួន ១៨០គ្រឿងបន្ថែមពីប្រទេសកូរ៉េខាងត្បូង៕