(សាន់ហ្សូស៊េ)៖ រដ្ឋមន្ត្រីក្រសួងយុត្តិធម៌របស់ប្រទេសកូស្តារីកា លោក Gerald Campos បានឱ្យដឹងថា កូស្តារីកា នឹងចាប់ផ្តើមការដ្ឋានសាងសង់ពន្ធនាគារធំមួយ ដែលមានការយាមកាមតឹងរ៉ឹងបំផុត របៀបដូចនៅអែលសាល់វ៉ាឌ័រ ដែលក្រុមសិទ្ធិមនុស្សពិពណ៌នាថា មានលក្ខណៈអមនុស្សធម៌ និងការស្លាប់នៅក្នុងពន្ធនាគារ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១៤ ខែសីហា ឆ្នាំ ២០២៥។

កូស្តារីកា ដែលត្រូវបានចាត់ទុកថាជាប្រទេសមានសុវត្ថិភាពបំផុត នៅតំបន់អាមេរិកកណ្តាល កំពុងប្រឈមមុខនឹងរលក នៃការសម្លាប់មនុស្ស ដែលត្រូវបានសន្មត់ថា ជាអំពើហិង្សាពីសំណាក់ក្រុមគ្រឿងញៀន។ ក្នុងឆ្នាំ ២០២៣ កូស្តារីកា មានអត្រាមនុស្សឃាតខ្ពស់បំផុតមិនធ្លាប់មាន ហើយជាក្តីកង្វល់ចម្បងរបស់សាធារណជន។

តាមលោក Campos ការសាងសង់ពន្ធនាគារនេះ​ជា​រឿងចាំបាច់ ​ព្រោះ​កន្លែង​បច្ចុប្បន្ន​មាន​មនុស្ស​លើស​ចំណុះ​ជិត ៣០ភាគរយ។ កន្លែងថ្មីនេះត្រូវបានសាងសង់ឡើង ដើម្បីផ្ទុកអ្នកទោសបានដល់ចំនួន ៥ ១០០នាក់។ សម្រាប់គម្រោងសាងសង់ រដ្ឋាភិបាលកូស្តារីកា ផ្តល់ថវិកាចំនួន ៣៥លានដុល្លារ ហើយអែលសាល់វ៉ាឌ័រ សហការលើប្លង់មេ និងបច្ចេកវិទ្យាសន្តិសុខ៕