(បាងកក)៖ ក្រុមហ៊ុនថាមពលយក្សរបស់រដ្ឋថៃ PTT បានប្រកាសពីការធ្លាក់ចុះប្រាក់ចំណេញយ៉ាងគំហុក នៅក្នុងត្រីមាសទី២ នៃឆ្នាំ២០២៥ ដោយប្រាក់ចំណេញសុទ្ធរបស់ក្រុមហ៊ុននេះ បានធ្លាក់ចុះជិត ៤០% មកនៅត្រឹម ២១.៥ពាន់លានបាត បើធៀបនឹង ៣៥.៥ពាន់លានបាតក្នុងរយៈពេលដូចគ្នាកាលពីឆ្នាំមុន។ នេះបើយោងតាមការចេញផ្សាយដោយកាសែត The Nation។

យោងតាមសេចក្តីថ្លែងការណ៍របស់ក្រុមហ៊ុន មូលហេតុចម្បងនៃការធ្លាក់ចុះនេះ គឺដោយសារតែអាជីវកម្មសំខាន់ៗរបស់ខខ្លួន ដូចជា ផ្នែកគីមី និងការចម្រាញ់ប្រេង រកចំណូលបានតិចជាងមុន ស្របពេលដែលអាជីវកម្មរុករក និងផលិតប្រេងកាតរបស់ខ្លួន ក៏លក់មិនសូវដាច់ ហើយតម្លៃលក់ក៏ធ្លាក់ចុះដែរ។ ទន្ទឹមនឹងនេះ ការចំណាយរបស់ក្រុមហ៊ុនក៏កើនឡើងខ្ពស់ជាងមុនផងដែរ។

ទោះជាយ៉ាងណា ក្រុមហ៊ុនថាមពលរបស់ថៃមួយនេះ មិនបានបញ្ជាក់ការធ្លាក់ចុះប្រាក់ចំណេញរបស់ខ្លួននេះ ទៅនឹងកត្តាជម្លោះព្រំដែនកម្ពុជា-ថៃនោះទេ។

គួរបញ្ជាក់ថា ថ្មីៗនេះក្នុងបរិបទតានតឹងក្នុងបញ្ហាព្រំដែននៃប្រទេសទាំងពីរ រាជរដ្ឋាភិបាលកម្ពុជា បានសម្រេចបិទការនាំចូលប្រេងឥន្ធនៈ និងឧស្ម័នពីប្រទេសថៃ ដែលជាវិធានការឆ្លើយតបនឹងការគំរាមកំហែងពីរដ្ឋាភិបាលថៃ៕