(មូស្គូ)៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយនៅថ្ងៃព្រហស្បតិ៍ថា សហរដ្ឋអាមេរិកកំពុង «ខិតខំប្រឹងប្រែងដោយស្មោះ» ដើម្បីបញ្ឈប់សង្គ្រាមនៅអ៊ុយក្រែន ហើយបានលើកឡើងថា ទីក្រុងមូស្គូ និងវ៉ាស៊ីនតោនអាចនឹងព្រមព្រៀងគ្នាលើកិច្ចព្រមព្រៀងអាវុធនុយក្លេអ៊ែរមួយ ដែលជាផ្នែកមួយនៃកិច្ចខិតខំប្រឹងប្រែងដើម្បីពង្រឹងសន្តិភាព។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការអត្ថាធិប្បាយនេះ ត្រូវបានធ្វើឡើងនៅក្នុងកិច្ចប្រជុំមួយ ជាមួយរដ្ឋមន្ត្រីជាន់ខ្ពស់ និងមន្ត្រីសន្តិសុខរបស់លោក មួយថ្ងៃមុនជំនួបកំពូលនៅរដ្ឋអាឡាស្កា ជាមួយប្រធានាធិបតីអាមេរិក លោក ដូណាល់ ត្រាំ។ លោក ពូទីន បានបញ្ជាក់នៅក្នុងសុន្ទរកថា ដែលផ្សាយតាមទូរទស្សន៍ថា សហរដ្ឋអាមេរិក «តាមគំនិតរបស់ខ្ញុំ កំពុងខិតខំប្រឹងប្រែងយ៉ាងស្វាហាប់ និងដោយស្មោះ ដើម្បីបញ្ឈប់អរិភាពបញ្ឈប់វិបត្តិ និងឈានដល់កិច្ចព្រមព្រៀងដែលជាផលប្រយោជន៍របស់ភាគីពាក់ព័ន្ធទាំងអស់ ដើម្បីបង្កើតលក្ខខណ្ឌសម្រាប់សន្តិភាពយូរអង្វែង។ ប្រសិនបើនៅដំណាក់កាលបន្ទាប់ យើងឈានដល់កិច្ចព្រមព្រៀងក្នុងវិស័យគ្រប់គ្រងអាវុធយុទ្ធសាស្ត្រវាយលុក»។

ការលើកឡើងរបស់លោក ពូទីន បានបញ្ជាក់យ៉ាងច្បាស់ថា រុស្ស៊ីនឹងលើកយកបញ្ហាការគ្រប់គ្រងអាវុធនុយក្លេអ៊ែរ មកពិភាក្សានៅក្នុងជំនួបជាមួយលោក ត្រាំ។ សន្ធិសញ្ញា New START ដែលជាសន្ធិសញ្ញាចុងក្រោយដែលនៅសេសសល់រវាងមហាអំណាចនុយក្លេអ៊ែរទាំងពីរ និងដែលកំណត់ចំនួនក្បាលគ្រាប់នុយក្លេអ៊ែរដែលបានដាក់ពង្រាយត្រឹម ១,៥៥០ សម្រាប់ភាគីនីមួយៗ នឹងត្រូវផុតកំណត់នៅថ្ងៃទី៥ ខែកុម្ភៈ ឆ្នាំក្រោយ។

គួរបញ្ជាក់ថា ជំនួយការរបស់លោក ពូទីន លោក Yuri Ushakov បានឱ្យដឹងថា ជំនួបកំពូលនេះនឹងផ្តោតសំខាន់លើបញ្ហាអ៊ុយក្រែន ប៉ុន្តែក៏នឹងពិភាក្សាអំពីបញ្ហាសន្តិសុខអន្តរជាតិ និងសក្តានុពលនៃកិច្ចសហប្រតិបត្តិការសេដ្ឋកិច្ចរវាងរុស្ស៊ី-អាមេរិកផងដែរ។ លោក Ushakov បានបញ្ជាក់ថា មេដឹកនាំទាំងពីរនឹងជួបគ្នាដោយផ្ទាល់ ដោយមានតែអ្នកបកប្រែប៉ុណ្ណោះ មុននឹងបន្តកិច្ចប្រជុំជាមួយគណៈប្រតិភូ និងសន្និសីទសារព័ត៌មានរួមគ្នា៕