(ហ្ស៊េរុយសាឡិម)៖ រដ្ឋមន្ត្រីហិរញ្ញវត្ថុស្ដាំនិយមជ្រុលរបស់អ៉ីស្រាអែល លោក Bezalel Smotrich បានប្រកាសថានឹងចាប់ផ្ដើមឡើងវិញនូវគម្រោងសាងសង់លំនៅឋានដែលនឹងពុះចែកតំបន់ West Bank ហើយកាត់ផ្ដាច់ដែនដីប៉ាឡេស្ទីនមួយនេះពីទីក្រុងហ្ស៊េរុយសាឡិមខាងកើត (East Jerusalem) ជាផែនការមួយដែលការិយាល័យរបស់លោកនិយាយថានឹង «កប់ចោល» នូវគំនិតចង់បង្កើតរដ្ឋប៉ាឡេស្ទីន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

គម្រោងសង់លំនៅឋានមានឈ្មោះថា E1 ត្រូវបានពន្យារពេលជាយូរមកហើយ ខណៈប៉ាឡេស្ទីន និងអង្គការសហប្រជាជាតិបានថ្កោលទោសផែនការនេះ និងចាត់ទុកថាជាអំពើខុសច្បាប់ ដែលនឹងបំផ្លាញដល់ កិច្ចប្រឹងប្រែងស្វែងរកសន្តិភាពសម្រាប់តំបន់មជ្ឈិមបូព៌ា។ ឈរនៅឯទីតាំងនៃគម្រោងសង់លំនៅឋានខុសច្បាប់ ក្នុងទីក្រុង Maale Adumim កាលពីថ្ងៃព្រហស្បតិ៍ ទី១៤ ខែសីហា លោក Smotrich ដែលជានិគមជនអ៉ីស្រាអែលផងនោះ បាននិយាយថានាយករដ្ឋមន្ត្រីអ៉ីស្រាអែល លោក Benjamin Netanyahu និងប្រធានាធិបតីអាមេរិក លោក Donald Trump ក៏បានយល់ស្របនឹងការចាប់ផ្ដើមឡើងវិញនូវ គម្រោងអភិវឌ្ឍ E1 ផងដែរ បើទោះជាមិនទាន់មានការទទួលស្គាល់ភ្លាមៗពីមេដឹកនាំទាំង២ក៏ដោយ។

«មិនថានរណាក៏ដោយក្នុងពិភពលោកនេះដែលកំពុងព្យាយាមទទួលស្គាល់រដ្ឋប៉ាឡេស្ទីន ពួកគេនឹងទទួលបានចម្លើយតបរបស់យើងទៅវិញតាមរយៈសកម្មភាពជាក់ស្ដែង។ មិនមែនតាមរយៈឯកសារ ការសម្រេចចិត្ត ឬក៏សេចក្ដីថ្លែងការណ៍ឡើយ​ តែគឺជាសកម្មភាពជាក់ស្ដែងដូចជាការសាងសង់លំនៅឋាន និងការបង្កើតសង្កាត់»។ នេះជាការគូសបញ្ជាក់របស់លោក Smotrich។

គួរបញ្ជាក់ថា អ៉ីស្រាអែលបានផ្អាកគម្រោងអភិវឌ្ឍ E1 ក្នុងទីក្រុង Maale Adumim ក្នុងឆ្នាំ២០១២ និងបានផ្អាកជាថ្មីទៀតនៅឆ្នាំ២០២០ ដោយសារតែមានការប្រឆាំងជំទាស់ពីសហរដ្ឋអាមេរិក សម្ព័ន្ធមិត្តអឺរ៉ុប និងអង្គការសហប្រជាជាតិដែលចាត់ទុកថាគម្រោងនេះគំរាមកំហែងដល់អនាគតនៃកិច្ចព្រមព្រៀងសន្តិភាពរវាងប៉ាឡេស្ទីន និងអ៉ីស្រាអែល៕