(ព្រុចសែល)៖ ប្រធានគោលនយោបាយរបស់សហភាពអឺរ៉ុប (EU) លោកស្រី Kaja Kallas បាននិយាយកាលពីថ្ងៃព្រហស្បតិ៍សប្តាហ៍នេះថា ផែនការតាំងទីលំនៅរបស់អ៉ីស្រាអែល គឺមិនស្របនឹងច្បាប់អន្តរជាតិនោះទេ សូមអំពាវនាវដល់អាជ្ញាធរអ៉ីស្រាអែល កុំបន្តផែនការនេះទៀត។ នេះបើយោងតា​មការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១៥ ខែសីហា ឆ្នាំ ២០២៥។

រដ្ឋមន្ត្រីហិរញ្ញវត្ថុអ៉ីស្រាអែល លោក Bezalel Smotrich បានប្រកាសថា ការងារតាំងទីលំនៅដែលពន្យារពេលយូរមកហើយ នឹងចាប់ផ្តើមឡើងវិញ។ លោកស្រី Kallas គូសបញ្ជាក់ថា «ការសម្រេចចិត្តរបស់អាជ្ញាធរអ៉ីស្រាអែល ដើម្បីជំរុញផែនការតាំងទីលំនៅ នឹងធ្វើឱ្យប៉ះពាល់ថែមទៀត ដល់ដំណោះស្រាយរដ្ឋពីរ ខណៈកំពុងបំពានច្បាប់អន្តរជាតិ។ EU សូមបញ្ជាក់ជាថ្មី នូវការអំពាវនាវដល់អ៉ីស្រាអែល ឱ្យបញ្ឈប់ការសាងសង់ទីលំនៅ នៅក្នុងផែនការនោះ»។

គួរបញ្ជាក់ថា ផែនការតំាងទីលំនៅរបស់អ៉ីស្រាអែល ដែលទើបនឹងប្រកាសនាពេលនេះ នឹងនាំឱ្យមានការពុះចែកតំបន់ West Bank ហើយកាត់តំបន់នេះចេញពីក្រុងហ៊្សេរុយសាឡិមខាងកើត (East Jerusalem)៕