លោក ត្រាំ៖ អ្នកកាសែត គួរតែត្រូវបានអនុញ្ញាត ឱ្យចូលក្នុងតំបន់ហ្កាហ្សា
15-08-2025 11:53
(វ៉ាស៉ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃព្រហស្បតិ៍សប្តាហ៍នេះថា លោកចង់ឃើញអ្នកកាសែត ទទួលបានសិទ្ធិចូលទៅកាន់តំបន់ហ្កាហ្សា ដើម្បីទៅមើលកិច្ចខិតខំប្រឹងប្រែងផ្នែកមនុស្សធម៌។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១៥ ខែសីហា ឆ្នាំ ២០២៥។
អ៉ីស្រាអែល មិនអនុញ្ញាតឱ្យអ្នកកាសែតបរទេស ចូលក្នុងតំបន់ហ្កាហ្សាឡើយ ចាប់តាំងពីផ្ទុះសង្គ្រាម នៅខែតុលា ឆ្នាំ២០២៣ លុះត្រាតែមានយោធាអ៉ីស្រាអែលអមដំណើរទៅជាមួយ។ នៅឯការិយាល័យរាងពងក្រពើ លោក ត្រាំ គូសបញ្ជាក់ថា «ខ្ញុំចង់ឃើញវាកើតឡើង។ ពិតជាល្អណាស់ ដែលឱ្យអ្នកកាសែតចូលទៅហ្កាហ្សា។ វាជាតួនាទីដ៏គ្រោះថ្នាក់ណាស់ ដូចអ្នកកាសែតខ្លួនឯងដឹងស្រាប់ ប៉ុន្តែខ្ញុំចង់ឃើញ»។
គួរបញ្ជាក់ថា សាធារណមតិបានរិះគន់អ៉ីស្រាអែល នៅពេលដែលមានការចេញផ្សាយតួលេខអ្នកស្លាប់ ឬរបួសពីទីភ្នាក់ងារគ្រប់គ្រងដោយក្រុមហាម៉ាសនៅហ្កាហ្សា និងការមិនអនុញ្ញាតឱ្យអ្នកកាសែតអន្តរជាតិចូលក្នុងតំបន់។ មន្ត្រីអ៉ីស្រាអែលបានលើកឡើងពីហេតុផលសន្តិសុខ សម្រាប់ការដាក់កំហិតលើអ្នកកាសែត៕
