(ព្យុងយ៉ាង)៖ នៅថ្ងៃសុក្រ ទី១៥ ខែសីហា ប្រព័ន្ធផ្សព្វផ្សាយរដ្ឋកូរ៉េខាងជើង បានរាយការណ៍ថា ប្រធានាធិបតីរុស្ស៉ី​ លោក វ៉្លាឌីមៀ ពូទីន បានស្ងើចសរសើរកងទ័ពកូរ៉េខាងជើង ដែលបានចូលរួមជួយទីក្រុងមូស្គូ ប្រយុទ្ធជាមួយអ៊ុយក្រែនថា ពោរពេញដោយវីរភាព ក្នុងលិខិតមួយផ្ញើទៅកាន់មេដឹកនាំកំពូលកូរ៉េខាងជើង លោក គីម ជុងអ៊ុន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្នុងលិខិតនាឱកាសខួបនៃការរំដោះឧបទ្វីបកូរ៉េចេញពីការគ្រប់គ្រងរបស់ជប៉ុន លោក ពូទីន បានរម្លឹកអំពីការដែលកងទ័ពក្រហមរបស់សូវៀត និងកងកម្លាំងរបស់កូរ៉េខាងជើង បានប្រកៀកស្មាគ្នាប្រយុទ្ធតស៊ូ ដើម្បីបញ្ចប់ការត្រួតត្រាអាណានិគមនៃចក្រពត្តិជប៉ុន។ ក្នុងលិខិត លោក ពូទីន បានប្រាប់លោក គីម ថា ចំណងមិត្តភាពផ្នែកយោធា សុឆន្ទៈ និងការជួយគ្នាទៅវិញទៅមក ដែលត្រូវបានពង្រឹងតាំងតែពីអំឡុង​ពេលសម័យសង្រ្គាមយូរមកហើយនោះ គឺនៅតែមានភាពរឹងមាំនិងអាចជឿជាក់បាន សូម្បីមកទល់សព្វថ្ងៃ។

លោកប្រធានាធិបតីរុស្ស៉ី បានបន្តថា «នេះសបញ្ជាក់ឱ្យឃើញយ៉ាងពេញលេញ នូវការចូលរួមពោរពេញដោយវីរភាពនៃកងទ័ពកូរ៉េខាងជើង ក្នុងការជួយរំដោះទឹកដីនៃតំបន់ Kursk ចេញពីកងកម្លាំងត្រួតត្រាអ៊ុយក្រែន។ ប្រជាជនរុស្ស៉ីនឹងចងចាំទុកក្នុងចិត្តជាប់និច្ច អំពីភាពអង់អាចក្លាហាននិងការពលីរបស់ពួកគេ»។

គួរបញ្ជាក់ថា រុស្ស៉ីនិងកូរ៉េខាងជើង បាននិងកំពុងផ្សារភ្ជាប់ទំនាក់ទំនងកាន់តែជិតស្និទ្ធខ្លាំងឡើង ដោយប្រទេសទាំងពីរ បានចុះកិច្ចព្រមព្រៀងជួយការពារគ្នាទៅវិញទៅមក កាលពីឆ្នាំមុន នៅពេលលោក ពូទីន ធ្វើទស្សនកិច្ចទៅកាន់កូរ៉េខាងជើង។ កាលពីខែមេសា ឆ្នាំនេះ កូរ៉េខាងជើងបានទទួលស្គាល់ជាលើកដំបូង អំពីការបញ្ជូនកងទ័ពទៅជួយរុស្ស៉ីប្រយុទ្ធក្នុងសង្រ្គាមប្រឆាំង​អ៊ុយក្រែន។

បើតាមចារកម្មកូរ៉េខាងត្បូងនិងលោកខាងលិច ទីក្រុងព្យុងយ៉ាងបានបញ្ជូនទាហានច្រើនជាង ១០ ០០០នាក់ទៅតំបន់ Kursk របស់រុស្ស៉ីកាលពីឆ្នាំ២០២៤ រួមជាមួយគ្រាប់កាំភ្លើងធំ មីស៉ីល និងប្រព័ន្ធរ៉ុក្កែតចម្ងាយឆ្ងាយ។ ទីក្រុងសេអ៊ូលបានប៉ាន់ប្រមាណថា កងទ័ពកូរ៉េខាងជើងប្រហែល៦០០នាក់ បានស្លាប់ និងខ្ទង់ពាន់នាក់បានរងរបួស អំឡុងពេលជួយរុស្ស៉ីប្រយុទ្ធ ក្នុងសង្រ្គាមអ៊ុយក្រែន៕