នាយករដ្ឋមន្រ្តីឥណ្ឌា ប្តេជ្ញាការពារកសិករ និងប្រាប់ដល់ប្រជាជាតិឱ្យបង្កើនការពឹងផ្អែកលើខ្លួនឯង
15-08-2025 15:16
(ញូវដែលី)៖ នាយករដ្ឋមន្រ្តីឥណ្ឌា លោក Narendra Modi បានអំពាវនាវដល់ប្រជាជាតិ ឱ្យពឹងផ្អែកលើខ្លួនឯងកាន់តែខ្លាំង ផលិតអ្វីៗគ្រប់យ៉ាង ចាប់ពីជីកសិកម្ម រហូតដល់ម៉ាស៉ីនយន្តហោះ និងអាគុយអគ្គិសនី ហើយប្តេជ្ញាការពារកសិករ ខណៈដែលឥណ្ឌា កំពុងប្រឈមមុខនឹងបញ្ហាពាណិជ្ជកម្មជាមួយទីក្រុងវ៉ាស៉ីនតោន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១៥ ខែសីហា ឆ្នាំ ២០២៥។
ក្នុងសុន្ទរកថាប្រចាំឆ្នាំ នៅឯទីលាន Red Fort ទីក្រុង New Delhi លោក Modi បានបញ្ជាក់ថា «កសិករ អ្នកនេសាទ អ្នកចិញ្ចឹមគោ គឺជាអាទិភាពចម្បងរបស់យើង។ Modi នឹងរារាំងគោលនយោបាយណា ដែលគំរាមកំហែងដល់ផលប្រយោជន៍។ ឥណ្ឌា នឹងមិនខ្លាចរអាក្នុងការការពារផលប្រយោជន៍កសិករយើងឡើយ»។
លោក Modi ក៏បានជំរុញឱ្យមានការបង្កើនផលិតក្នុងស្រុក ដោយឱ្យឈ្មោះថាទំនិញហិណ្ឌូ មកតំណាងជាទំនិញផលិតក្នុងប្រទេស។ តាមលោក Modi បន្ទះឈីបផលិតនៅឥណ្ឌា នឹងវាយលុកទីផ្សារនាចុងឆ្នាំនេះ ហើយក៏កំពុងជំរុញឱ្យមានការពឹងផ្អែកលើខ្លួនឯង ក្នុងការផលិតសារធាតុរ៉ែសំខាន់ៗ ជាមួយនិងការរុករករ៉ែដែលកំពុងដំណើរការ នៅជាង ១ ២០០ទីតាំង។
គួរបញ្ជាក់ថា លោក Modi មិនបាននិយាយពីពន្ធគយរបស់សហរដ្ឋអាមេរិកទេ នៅក្នុងសុន្ទរកថារយៈពេលពីរម៉ោង ប៉ុន្តែកាលពីសប្តាហ៍មុន លោកប្រធានាធិបតី ដូណាល់ ត្រាំ បានប្រកាសបង្កើនពន្ធលើការនាំចូលពីឥណ្ឌាថែម ២៥ភាគរយទៀត ដែលនាំឱ្យចំនួនសរុបកើនឡើងដល់ ៥០ភាគរយ។ អត្រាពន្ធគយថ្មីនេះ នឹងរំខានដល់ទីផ្សារនាំចេញដ៏ធំបំផុតរបស់ឥណ្ឌា ដែលមានការនាំចេញសរុបក្នុងឆ្នាំ ២០២៤ គិតជាទឹកប្រាក់ជិត ៨៧ពាន់លានដុល្លារ ដោយវាយលុកលើវិស័យ វាយនភ័ណ្ឌ ស្បែកជើង ត្បូង និងគ្រឿងអលង្ការ៕
