(ហ្សាការតា)៖ ប្រធានាធិបតីឥណ្ឌូណេស៊ី លោក Prabowo Subianto បានប្រកាសនៅថ្ងៃសុក្រថា រដ្ឋាភិបាលនឹងបើកយុទ្ធនាការបង្ក្រាបទ្រង់ទ្រាយធំមួយទៅលើការកេងប្រវ័ញ្ចធនធានធម្មជាតិខុសច្បាប់ បន្ទាប់ពីការស្ទង់មតិមួយបានរកឃើញថា ចម្ការដូងប្រេងលើផ្ទៃដីរហូតដល់ ៣.៧លានហិកតា កំពុងដំណើរការដោយរំលោភច្បាប់។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

នៅក្នុងសុន្ទរកថាជាតិប្រចាំឆ្នាំលើកដំបូងរបស់លោក លោក ប្រាបូវ៉ូ បានបញ្ជាក់ថា ផ្ទៃដីចម្ការដូងប្រេងដែលកំពុងស្ថិតក្រោមការស៊ើបអង្កេតមានសរុបដល់ទៅ ៥លានហិកតា ដែលជាប់សង្ស័យថាបានដំណើរការក្នុងតំបន់ព្រៃការពារ មិនបានរាយការណ៍ពីទំហំពិតប្រាកដ ឬមិនអើពើនឹងការកោះហៅពីសវនករ។ លោកបានថ្លែងនៅក្នុងសភាថា «យើងនឹងធានាថា ប្រជាជនឥណ្ឌូណេស៊ីនឹងមិនក្លាយជាជនរងគ្រោះនៃសេដ្ឋកិច្ចលោភលន់នោះទេ» ដោយបន្ថែមថា រដ្ឋាភិបាលដោយមានជំនួយពីយោធា បានរឹបអូសចម្ការដូងប្រេងខុសច្បាប់ចំនួន ៣.១លានហិកតារួចហើយ។

ក្នុងនាមជាអតីតមេបញ្ជាការកងកម្លាំងពិសេស លោក ប្រាបូវ៉ូ ក៏បានព្រមានផងដែរថា រដ្ឋអាចនឹងរឹបអូសទ្រព្យសម្បត្តិរបស់ក្រុមហ៊ុនដែល «រៀបចំគំនិត និងរំលោភបំពាន» ច្បាប់របស់ឥណ្ឌូណេស៊ី។ លោកបានបន្ថែមថា រដ្ឋាភិបាលក៏កំពុងរៀបចំផែនការបង្ក្រាបលើវិស័យរ៉ែផងដែរ ដោយអាជ្ញាធរបានទទួលរបាយការណ៍អំពីប្រតិបត្តិការខុសច្បាប់រហូតដល់ ១,០៦៣ករណី នៅទូទាំងប្រជុំកោះដ៏ធំសម្បើមមួយនេះ។

គួរបញ្ជាក់ថា ប្រធានសមាគមប្រេងដូងឥណ្ឌូណេស៊ី (GAPKI) លោក Eddy Martono បានចោទសួរពីប្រភពនៃតួលេខរបស់លោកប្រធានាធិបតី និងបានបង្ហាញពីក្តីបារម្ភថា សកម្មភាពនេះ «នឹងបង្កើតរូបភាពអវិជ្ជមានមួយនៅឆាកអន្តរជាតិ ដែលបង្ហាញថា ប្រេងដូងឥណ្ឌូណេស៊ីកំពុងរុករានចូលក្នុងព្រៃ»។ ក្រោយសុន្ទរកថារបស់លោក ប្រាបូវ៉ូ សន្ទស្សន៍ភាគហ៊ុនធំរបស់ឥណ្ឌូណេស៊ីបានធ្លាក់ចុះ ០.៤% ខណៈដែលរូបិយប័ណ្ណរូពីយ៉ាក៏បានធ្លាក់ចុះ ០.៣% ផងដែរ៕