(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានបញ្ជាក់ថា លោកនឹងមិនចរចាក្នុងនាមអ៊ុយក្រែនឡើយ នៅក្នុងជំនួបរបស់លោកជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នាថ្ងៃសុក្រនេះ ហើយនឹងទុកឱ្យទីក្រុងកៀវជាអ្នកសម្រេចចិត្តដោយខ្លួនឯង ថាតើត្រូវចូលរួមក្នុងការដោះដូរទឹកដីជាមួយរុស្ស៊ីឬយ៉ាងណា។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក ត្រាំ បានបញ្ជាក់ថា គោលដៅរបស់លោក គឺនាំភាគីទាំងពីរឱ្យចាប់ផ្តើមការចរចា ហើយបញ្ហាដោះដូរទឹកដីណាមួយនឹងត្រូវលើកយកមកពិភាក្សានៅពេលនោះ។ លោក ត្រាំ បានប្រាប់អ្នកសារព័ត៌មាននៅលើយន្តហោះ Air Force One ថា «បញ្ហាទាំងនោះនឹងត្រូវបានពិភាក្សា ប៉ុន្តែខ្ញុំត្រូវតែទុកឱ្យអ៊ុយក្រែនជាអ្នកធ្វើការសម្រេចចិត្តនោះ ហើយខ្ញុំគិតថាពួកគេនឹងធ្វើការសម្រេចចិត្តបានត្រឹមត្រូវ។ ប៉ុន្តែខ្ញុំមិននៅទីនេះដើម្បីចរចាជំនួសអ៊ុយក្រែនទេ ខ្ញុំនៅទីនេះដើម្បីនាំពួកគេឱ្យមកអង្គុយតុចរចា»។

ការអត្ថាធិប្បាយរបស់លោក ត្រាំ ទំនងជានឹងផ្តល់នូវការធានាក្នុងកម្រិតមួយដល់អ៊ុយក្រែន ដែលកំពុងព្រួយបារម្ភថា កិច្ចចរចារវាងអាមេរិក-រុស្ស៊ីអាចនឹងនាំឱ្យមានបទឈប់បាញ់ ប៉ុន្តែលក្ខខណ្ឌសម្រាប់បទឈប់បាញ់នោះ គឺតម្រូវឱ្យអ៊ុយក្រែនបង់ថ្លៃដោយការបាត់បង់ទឹកដី និងអធិបតេយ្យភាពរបស់ខ្លួន។ លោក ត្រាំ ក៏បានលើកឡើងផងដែរថា ការវាយលុករបស់រុស្ស៊ីនៅអ៊ុយក្រែន ទំនងជាមានគោលបំណងជួយពង្រឹងជំហរចរចារបស់លោក ពូទីន នៅក្នុងកិច្ចព្រមព្រៀងបញ្ចប់សង្គ្រាមណាមួយ។

គួរបញ្ជាក់ថា ប្រធានាធិបតីអាមេរិកបានបង្ហាញសុទិដ្ឋិនិយមថា ជំនួបរបស់លោកជាមួយលោក ពូទីន នឹងបង្កើតលទ្ធផល ដោយសារតែបញ្ហាប្រឈម និងភាពទន់ខ្សោយនៃសេដ្ឋកិច្ចរុស្ស៊ី។ លោកបានបន្ថែមថា ការដែលលោក ពូទីន នាំមកជាមួយនូវនាយកប្រតិបត្តិធុរកិច្ច គឺជាសញ្ញាល្អមួយ ប៉ុន្តែលោកបានបញ្ជាក់ថា គ្មានកិច្ចព្រមព្រៀងណាមួយអាចធ្វើទៅបានទេ រហូតដល់សង្គ្រាមត្រូវបានដោះស្រាយ៕