(ហ្សឺណែវ)៖ ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃសុក្រថា ផែនការរបស់អ៉ីស្រាអែលក្នុងការសាងសង់លំនៅដ្ឋានថ្មីរាប់ពាន់ខ្នងនៅចន្លោះតំបន់តាំងទីលំនៅរបស់ខ្លួនក្នុងតំបន់ West Bank និងក្បែរទីក្រុងហ្សេរុយសាឡឹមខាងកើត គឺខុសច្បាប់ក្រោមច្បាប់អន្តរជាតិ ហើយនឹងធ្វើឱ្យប្រជាជនប៉ាឡេស្ទីននៅក្បែរនោះ ប្រឈមនឹងហានិភ័យនៃការបណ្តេញចេញដោយបង្ខំ ដែលត្រូវបានចាត់ទុកថាជាឧក្រិដ្ឋកម្មសង្គ្រាម។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

ការព្រមាននេះធ្វើឡើងបន្ទាប់ពីរដ្ឋមន្ត្រីហិរញ្ញវត្ថុស្តាំនិយមជ្រុលរបស់អ៉ីស្រាអែល លោក Bezalel Smotrich បានប្រកាសជំរុញគម្រោងតាំងទីលំនៅដែលជាប់គាំងជាយូរមកហើយ ដោយលោកបានអះអាងថា ចលនានេះនឹង «កម្ទេច» គំនិតបង្កើតរដ្ឋប៉ាឡេស្ទីន។

អ្នកនាំពាក្យការិយាល័យសិទ្ធិមនុស្ស UN បានបញ្ជាក់ថា ផែនការនេះនឹងបំបែកតំបន់ West Bank ទៅជាតំបន់ដាច់ដោយឡែកពីគ្នា ហើយវាគឺជា «ឧក្រិដ្ឋកម្មសង្គ្រាម សម្រាប់ប្រទេសកាន់កាប់មួយ នាំយកប្រជាជនខ្លួនឯងទៅរស់នៅលើទឹកដីដែលខ្លួនដណ្តើមបាន គឺជាឧក្រិដ្ឋកម្មសង្គ្រាម»។

គួរបញ្ជាក់ថា ប្រជាជនអ៉ីស្រាអែលប្រមាណ ៧០០,០០០នាក់ រស់នៅក្នុងចំណោមប្រជាជនប៉ាឡេស្ទីនចំនួន ២.៧លាននាក់ នៅតំបន់ West Bank និងហ្សេរុយសាឡឹមខាងកើត។ មហាអំណាចពិភពលោកភាគច្រើននិយាយថា ការពង្រីកតំបន់តាំងទីលំនៅនេះ ធ្វើឱ្យខូចដល់លទ្ធភាពនៃដំណោះស្រាយរដ្ឋពីរ ដោយសារតែវាបំបែកទឹកដីដែលប៉ាឡេស្ទីនចង់បានជាផ្នែកមួយនៃរដ្ឋឯករាជ្យនាពេលអនាគតរបស់ពួកគេ៕