(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយថាប្រធានាធិបតីរុស្ស៉ី លោក វ្ល៉ាឌីមៀ ពូទីន និងប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ចង់ឱ្យរូបលោក មានវត្តមានចូលរួមក្នុងកិច្ចប្រជុំណាមួយនៅពេលអនាគតរវាងមេដឹកនាំទាំង២ ដើម្បីពិភាក្សាពីជំហានឆ្ពោះទៅរកសន្តិភាព។ នេះបើតាមការចេញផ្សាយដោយសារព័ត៌មាន CNN។

ការកត់សម្គាល់បែបនេះរបស់លោក ត្រាំ ធ្វើឡើងក្នុងបទសម្ភាសន៍ជាមួយទូរទស្សន៍ Fox News នៅថ្ងៃសុក្រ ទី១៥ ខែសីហា បន្ទាប់ពីកិច្ចប្រជុំកំពូលក្នុងរដ្ឋ Alaska ជាមួយលោក ពូទីន បានបិទបញ្ចប់ទៅដោយមិនមានកិច្ចព្រមព្រៀងស្ដីពីអ៊ុយក្រែន។ លោក ត្រាំ បានលើកឡើងដូច្នេះថា «មេដឹកនាំទាំង២ ចង់ឱ្យខ្ញុំមានវត្តមាននៅទីនោះ (កិច្ចប្រជុំនៅពេលអនាគត)។ ពួកគេចង់ ឱ្យខ្ញុំមានវត្តមាននៅទីនោះ ហើយខ្ញុំនឹងមានវត្តមាននៅទីនោះ»។

នៅពេលត្រូវបានសាកសួរថាតើរូបលោកមានជឿចិត្តចំពោះថាតើសន្តិភាពអាចនឹងកើតឡើងទេក្នុងពេលដ៏ខ្លីខាងមុខ លោក ត្រាំ បានឆ្លើយថាពិតណាស់ សន្តិភាពនឹងកើតឡើងក្នុងពេលដ៏ខ្លី ខាងមុខ។ ប៉ុន្តែ រូបលោកក៏បានទទួលស្គាល់ដែរថារូបលោកធ្លាប់គិតខុសថាសង្រ្គាមអ៊ុយក្រែននឹងត្រូវបានដោះស្រាយយ៉ាងងាយស្រួល ដូចដែលលោកធ្លាប់បានសន្យាថានឹងបិទបញ្ចប់សង្រ្គាម នេះក្នុងពេល២៤ម៉ោង នៅពេលឡើងកាន់អំណាច៕