(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃសុក្រ ទី១៥ ខែសីហា បាននិយាយថាប្រធានាធិបតីចិន លោក ស៊ី ជីនពីង បានប្រាប់រូបលោកថាចិននឹង មិនបើកការវាយប្រហារលើតៃវ៉ាន់នោះទេ ដរាបណារូបលោកកាន់តំណែងជាប្រធានាធិបតីអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក ត្រាំ ធ្វើការកត់សម្គាល់បែបនេះក្នុងបទសម្ភាសន៍ជាមួយទូរទស្សន៍ Fox News នៅមុនជំនួបជាមួយលោកប្រធានាធិបតីរុស្ស៉ី វ្ល៉ាឌីមៀ ពូទីន ក្នុងរដ្ឋ Alaska ស្ដីពីសង្រ្គាម នៅអ៊ុយក្រែនកាលពីថ្ងៃសុក្រ។ លោក ត្រាំ និងលោក ស៊ី ជីនពីង បានបើកកិច្ចសន្ទនាតាមទូរស័ព្ទជាលើកដំបូងចាប់តាំងពីលោក ត្រាំ ត្រឡប់មកកាន់អំណាចសាជាថ្មី នៅអាណត្តិទី២ កាលពីខែមិថុនា។ លោក ត្រាំក៏ធ្លាប់បាននិយាយកាលពីខែមេសាដែរថាលោក ស៊ី ជីនពីង បានហៅទូរស័ព្ទមកកាន់រូបលោក តែមិនបានបញ្ជាក់អ្វីលម្អិតថា តើកិច្ចសន្ទនាតាមទូរស័ព្ទនេះធ្វើឡើងនៅពេលណានោះទេ។

ដោយលើកឡើងពីសម្ដីរបស់លោក ស៊ី ជីនពីង លោក ត្រាំ បានគូសបញ្ជាក់ដូច្នេះថា «គាត់ (លោក ស៊ី ជីនពីង) បានប្រាប់ខ្ញុំថា៖ ខ្ញុំ (លោក ស៊ី ជីនពីង) នឹងធ្វើវានោះទេ (វាយប្រហារលើតៃវ៉ាន់) ដរាបណា អ្នកនៅកាន់តំណែងជាប្រធានាធិបតី»។

ចិនបានចាត់ទុកតៃវ៉ាន់ជាខេត្តមួយរបស់ខ្លួន ហើយថានឹងប្រើប្រាស់កម្លាំងយោធាដើម្បីបង្រួបបង្រួមជាតិ ក្នុងករណីចាំបាច់៕