លោក ត្រាំ ពិភាក្សាតាមទូរស័ព្ទជាមួយលោក ហ្សេលេនស្គី និងមេដឹកនាំអឺរ៉ុប ក្រោយកិច្ចប្រជុំជាមួយលោក ពូទីន (Video inside)
16-08-2025 14:29
(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅព្រឹកថ្ងៃសៅរ៍ ទី១៦ ខែសីហា បានបើកកិច្ចពិភាក្សាតាមទូរស័ព្ទជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និងមេដឹកនាំអឺរ៉ុប ដើម្បីពិភាក្សាគ្នាអំពីកិច្ចប្រជុំកំពូលរបស់លោកជាមួយប្រធានាធិបតីរុស្ស៉ី លោក វ៉្ល៉ាឌីមៀ ពូទីន កាលពីថ្ងៃសុក្រ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។
AFP ដោយផ្អែកលើអ្នកនាំពាក្យម្នាក់របស់គណៈកម្មាការអឺរ៉ុប បានឱ្យដឹងថាលោក ត្រាំ បានពិភាក្សាតាមទូរស័ព្ទរយៈពេលជាង ១ម៉ោងជាមួយលោក ហ្សេលេនស្គី, នាយករដ្ឋមន្ត្រីអង់គ្លេស លោក Keir Starmer, ប្រធានាធិបតីបារាំង លោក Emmanuel Macron, អធិការបតីអាល្លឺម៉ង់ លោក Friedrich Merz, ប្រមុខ NATO លោក Mark Rutte ព្រមទាំងប្រធានគណៈកម្មការអឺរ៉ុប លោកស្រី Ursula von der Leyen។ ចំណែកខាងសេតវិមានវិញ តាមរយៈអ្នកនាំពាក្យលោកស្រី Karoline Leavitt ក៏បានទទួលស្គាល់ដែរថាលោក ត្រាំ បានពិភាក្សាតាមទូរស័ព្ទយ៉ាង វែងអន្លាយមួយជាមួយលោក ហ្សេលេនស្គីនៅតាមផ្លូវធ្វើដំណើរត្រឡប់ទៅកាន់ទីក្រុងវ៉ាស៊ីនតោន។
គួរបញ្ជាក់ថា លោក ដូណាល់ ត្រាំកាលពីថ្ងៃសុក្រ បាននិយាយថារូបលោក និងប្រធានាធិបតីរុស្ស៉ី លោក វ្ល៉ាឌីមៀ ពូទីន មិនបានឈានដល់កិច្ចព្រមព្រៀងណាមួយ ដើម្បីដោះស្រាយ ឬក៏ផ្អាកសង្រ្គាមរបស់រុស្ស៉ីនៅអ៊ុយក្រែននោះទេ បន្ទាប់ពីកិច្ចប្រជុំកំពូលចាយពេលជិត៣ម៉ោងនៅរដ្ឋ Alaska បើទោះជាលោក ត្រាំ អះអាងពីភាពរីកចម្រើនក្នុងជំនួបជាមួយលោក ពូទីនក៏ដោយ៕