(អឺរ៉ុប)៖ បណ្តាមេដឹកនាំអឺរ៉ុប បានចេញសេចក្តីថ្លែងការណ៍រួមគ្នាមួយ បន្ទាប់ពីមានជំនួបរវាងប្រធានាធិបតីអាមេរិក លោក ដូណាល់ ត្រាំ និងប្រធានាធិបតីរុស្ស៉ី លោក វ្ល៉ាឌីមៀ ពូទីន នៅរដ្ឋ Alaska នាថ្ងៃសុក្រ ទី១៥ ខែសីហា (ម៉ោងនៅវ៉ាស៉ីនតោន)។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។

សេចក្តីថ្លែងការណ៍នេះចេញដោយប្រធានាធិបតីបារាំង លោក Emmanuel Macron នាយករដ្ឋមន្ត្រីអ៉ីតាលី លោកស្រី Giorgia Meloni អធិការបតីអាល្លឺម៉ង់ លោក Friedrich Merz នាយករដ្ឋមន្ត្រីអង់គ្លេស លោក Keir Starmer ប្រធានាធិបតីហ្វាំងឡង់ លោក Alexander Stubb នាយករដ្ឋមន្ត្រីប៉ូឡូញ លោក Donald Tusk ប្រធានក្រុមប្រឹក្សាអឺរ៉ុប លោក Antonio Costa និងប្រធានគណៈកម្មការសហភាពអឺរ៉ុប លោកស្រី Ursula von der Leyen។

នៅក្នុងសេចក្តីថ្លែងការណ៍ បានគូសបញ្ជាក់ថា «ព្រឹកមិញនេះ ប្រធានាធិបតី ត្រាំ បានរៀបរាប់ឱ្យពួកយេីង និងប្រធានាធិបតី ហ្សេលេនស្គី បានដឹង។ យេីងស្វាគមន៍ចំពោះកិច្ចខិតខំប្រឹងប្រែងរបស់ប្រធានាធិបតី ត្រាំ ដើម្បីបញ្ឈប់ការសម្លាប់ បញ្ចប់សង្រ្គាមឈ្លានពានរបស់រុស្ស៉ីនៅអ៊ុយក្រែន និងសម្រេចបានសន្តិភាពដ៏ត្រឹមត្រូវ និងយូរអង្វែង»។

សេចក្តីថ្លែងការណ៍ដដែល បានបន្ថែមថា «យើងក៏ត្រៀមខ្លួនជាស្រេចដើម្បីធ្វើការជាមួយប្រធានាធិបតី ត្រាំ និងប្រធានាធិបតី ហ្សេលេនស្គី ឆ្ពោះទៅរកកិច្ចប្រជុំកំពូលត្រីភាគីដោយមានការគាំទ្រពីអឺរ៉ុប»៕