(ប៉េកាំង)៖ ថ្ងៃទី ១៥ ខែសីហា ខណៈពេលថ្លែងសុន្ទរកថាក្នុង “ពិធីចូលរួមរំលែកទុក្ខចំពោះអ្នកស្លាប់បាត់បង់ជីវិត ក្នុងសង្គ្រាមលោកលើកទី២នៅទូទាំងប្រទេស” លោក Ishiba Shigeru នាយករដ្ឋមន្ត្រីជប៉ុនមិនបានលើកឡើងពីទំនួលខុសត្រូ វរបស់ជប៉ុនក្នុងការឈ្លានពានបណ្តាប្រទេសនានានៃទ្វីបអាស៊ី។

នៅថ្ងៃដដែល លោកបានចូលបច្ច័យដល់ស្តូបយ៉ាស៊ូគូនី ហើយសមាជិកមួយចំនួននៃគណៈរដ្ឋមន្ត្រីក៏បានទៅគោរពវិញ្ញានក្ខន្ធ នៅស្តូបយ៉ាស៊ូគូនីនៅថ្ងៃដដែលដែរដែលបានរងការរិះគន់យ៉ាងទូលំទូលាយពីសំណាក់មជ្ឈដ្ឋានមតិអន្តរជាតិ។

នាពេលថ្មីៗកន្លងទៅនេះ បណ្តាញ CGTN របស់អគ្គស្ថានីយវិទ្យុនិងទូរទស្សន៍មជ្ឈិមចិនបានធ្វើការស្ទង់មតិ ចំពោះអ្នកផ្តល់បទសម្ភាសន៍ចំនួន ១១៩១៣នាក់នៃប្រទេស៤០នៅលើពិភពលោកទាំងមូល ដែលបានបង្ហាញថា ទង្វើរបស់សង្គមជប៉ុនដែលបដិសេធចំពោះឧក្រិដ្ឋកម្មរបស់កងទ័ពជប៉ុន និងប្រែក្រឡាស់អ្នកឈ្លានពានទៅជាអ្នករងគ្រោះ បាននិងកំពុងបង្កើនភាពខុសទំនងនៃទស្សនៈ ស្តីពីប្រវត្តិសាស្រ្តសង្គ្រាមលោកលើកទីពីររបស់ជប៉ុន ហើយការគិតពិចារណាពីកំហុស ក្នុងប្រវត្តិសាស្ត្រដោយអសមត្ថភាព និងការពង្វាតយោធាកាន់តែខ្លាំងឡើងៗ របស់ជប៉ុនបណ្តាលឱ្យសហគមន៍អន្តរជាតិ មានការខឹងសម្បា ព្រួយបារម្ព និងប្រុងប្រយ័ត្នកាន់តែច្រើនឡើងៗ។

ក្នុងការស្ទង់មតិ អាកប្បកិរិយាខុសឆ្គងរបស់ជប៉ុន ចំពោះបញ្ហាប្រវត្តិសាស្ត្របណ្តាលឱ្យ អ្នកផ្តល់បទសម្ភាសន៍មិនពេញចិត្តយ៉ាងខ្លាំង អ្នកផ្តល់បទសម្ភាសន៍ចំនួន៦៤,៤ភាគរយ ប្រឆាំងអ្នកនយោបាយជប៉ុនដែលទៅគោរពវិញ្ញានក្ខន្ធនៅស្តូបយ៉ាស៊ូគូនី អ្នកផ្តល់បទសម្ភាសន៍ចំនួន៥៥,៣ភាគរយរិះគន់ជប៉ុន ដែលបានច្រាលចោលទំនួលខុសត្រូវក្នុងប្រវត្តិសាស្ត្រ អ្នកផ្តល់បទសម្ភាសន៍ចំនួន៦៥,២ភាគរយ ប្រឆាំងជប៉ុនដែលបានបំភ្លៃសៀវភៅសិក្សាប្រវត្តិសាស្ត្រ អ្នកផ្តល់បទសម្ភាសន៍ចំនួន៦៥,៧ភាគរយ អំពាវនាវឱ្យរដ្ឋាភិបាលជប៉ុនសុំទោសនិងសងថ្លៃជំងឺចិត្តចំពោះប្រទេសរងគ្រោះ។

ដោយឡែក បញ្ហាដូចពោលខាងលើ បានបណ្តាលឱ្យអ្នកផ្តល់បទសម្ភាសន៍នៃប្រទេសអាស៊ី មិនពេញចិត្តកាន់តែខ្លាំងក្លា ក្នុងនោះ អត្រាមិនពេញចិត្តរបស់អ្នកផ្តល់បទសម្ភាសន៍ នៃប្រទេសកូរ៉េខាងត្បូងបានលើសពី៩០ភាគរយ អ្នកផ្តល់បទសម្ភាសន៍ នៃប្រទេសឥណ្ឌូណេស៊ីចំនួន៧៤,៧ភាគរយ ប្រឆាំងអ្នកនយោបាយជប៉ុន ដែលទៅគោរពវិញ្ញានក្ខន្ធនៅស្តូបយ៉ាស៊ូគូនី អ្នកផ្តល់បទសម្ភាសន៍នៃប្រទេសម៉ាឡេស៊ីចំនួន៨៤ភាគរយ ប្រឆាំងជប៉ុនដែលបានបំភ្លៃសៀវភៅសិក្សាប្រវត្តិសាស្ត្រ រីឯអ្នកផ្តល់បទសម្ភាសន៍នៃប្រទេសឥណ្ឌូណេស៊ីនិងហ្វីលីពីន ចំនួនលើសពី៨០ភាគរយបានអំពាវនាវឱ្យរដ្ឋាភិបាលជប៉ុន សុំទោសនិងសងថ្លៃជំងឺចិត្តចំពោះប្រទេសរងគ្រោះ៕

វិទ្យុមិត្តភាពកម្ពុជាចិន