(ញូវយ៉ក)៖ នគរបាលទីក្រុងញូវយ៉កបានឱ្យដឹងកាលពីព្រឹកថ្ងៃអាទិត្យថា មនុស្ស ៣នាក់បានស្លាប់ និង ៨នាក់ផ្សេងទៀតបានរងរបួស នៅក្នុងហេតុការណ៍បាញ់ប្រហារមួយដែលបានកើតឡើងនៅក្លឹបមួយកន្លែងក្នុងខណ្ឌ Brooklyn។ នេះបើយោងតាមការចេញផ្សាយ ដោយសារព័ត៌មាន NBC។

នៅក្នុងសន្និសីទសារព័ត៌មានមួយ ស្នងការនគរបាលទីក្រុងញូវយ៉ក លោកស្រី Jessica Tisch បានបញ្ជាក់ថា ហេតុការណ៍បាញ់ប្រហារនេះបានកើតឡើងនៅក្លឹប «Taste Of The City Lounge» លើវិថី Franklin ក្នុងសង្កាត់ Crown Heights។ លោកស្រីបានបន្ថែមថា ជនដៃដល់មានច្រើននាក់ ហើយរហូតមកដល់ពេលនេះ នគរបាលមិនទាន់ចាប់ខ្លួនជនសង្ស័យណាម្នាក់នៅឡើយទេ ដោយការស៊ើបអង្កេតកំពុងបន្តធ្វើ។

លោកស្រី Tisch បានឱ្យដឹងទៀតថា ជនរងគ្រោះដែលបានស្លាប់រួមមាន បុរសអាយុ ២៧ឆ្នាំម្នាក់, បុរសអាយុ ៣៥ឆ្នាំម្នាក់ និងបុរសម្នាក់ទៀតដែលមិនទាន់ស្គាល់អត្តសញ្ញាណ។ ចំណែកឯអ្នករងរបួសទាំង ៨នាក់ផ្សេងទៀត ត្រូវបានបញ្ជូនទៅកាន់មន្ទីរពេទ្យក្នុងតំបន់ ដោយរបួសរបស់ពួកគេមិនមានគ្រោះថ្នាក់ដល់អាយុជីវិតនោះទេ។

លោកស្រី Tisch បានសង្កត់ធ្ងន់ថា «វាគឺជារឿងដ៏អាក្រក់មួយដែលបានកើតឡើងនៅព្រឹកនេះ ហើយយើងនឹងធ្វើការស៊ើបអង្កេត ដើម្បីកំណត់ឱ្យបានច្បាស់ពីអ្វីដែលបានកើតឡើង»៕