(តែលអាវីវ)៖ ប្រជាជនអ៉ីស្រាអែលរាប់ពាន់នាក់ បានចូលរួមក្នុងកូដកម្ម និងបាតុកម្មទូទាំងប្រទេសកាលពីថ្ងៃអាទិត្យ ដើម្បីគាំទ្រគ្រួសារចំណាប់ខ្មាំងដែលកំពុងជាប់ឃុំនៅតំបន់ហ្កាហ្សា ព្រមទាំងអំពាវនាវឱ្យនាយករដ្ឋមន្ត្រី លោក Benjamin Netanyahu ឈានដល់កិច្ចព្រមព្រៀងជាមួយក្រុមហាម៉ាស ដើម្បីបញ្ចប់សង្គ្រាម និងដោះលែងចំណាប់ខ្មាំងដែលនៅសល់។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

ក្រុមបាតុករបានគ្រវីទង់ជាតិអ៉ីស្រាអែល និងកាន់រូបថតចំណាប់ខ្មាំង ខណៈដែលសំឡេងកញ្ចែ និងស្គរ បានលាន់រំពងនៅតាមទីតាំងប្រមូលផ្តុំនានា។ ក្រុមបាតុករមួយចំនួនបានបិទផ្លូវ រួមទាំងផ្លូវធំដែលតភ្ជាប់រវាងទីក្រុងហ្សេរុយសាឡឹម និងតែលអាវីវ។ លោកស្រី Anat Angrest ដែលជាម្តាយរបស់ចំណាប់ខ្មាំង Matan Angrest បានប្រាប់អ្នកសារព័ត៌មាននៅទីក្រុងតែលអាវីវថា «ថ្ងៃនេះ អ្វីៗគ្រប់យ៉ាងត្រូវតែបញ្ឈប់ ដើម្បីរំឭកពីតម្លៃដ៏ខ្ពង់ខ្ពស់បំផុត នោះគឺភាពពិសិដ្ឋនៃជីវិតមនុស្ស»។

តារាសម្តែងហូលីវូដដើមកំណើតអ៉ីស្រាអែល លោកស្រី Gal Gadot ដែលល្បីល្បាញក្នុងតួនាទី Wonder Woman ក៏បានបង្ហាញវត្តមានគាំទ្រ និងជួបជាមួយក្រុមគ្រួសារចំណាប់ខ្មាំងនៅទីក្រុងតែលអាវីវផងដែរ។

គួរបញ្ជាក់ថា នគរបាលអ៉ីស្រាអែលបានឱ្យដឹងថា បាតុករចំនួន ៣៨នាក់ត្រូវបានឃាត់ខ្លួន។ បាតុកម្មនៅទូទាំងប្រទេសត្រូវបានផ្អាកមួយរយៈខ្លី នៅពេលដែលសំឡេងស៊ីរ៉ែនប្រកាសអាសន្នបានបន្លឺឡើងនៅទីក្រុងតែលអាវីវ និងហ្សេរុយសាឡឹម ដើម្បីព្រមានពីការបាញ់មីស៊ីលពីប្រទេសយេម៉ែន។ មីស៊ីលនោះត្រូវបានស្ទាក់ចាប់ដោយគ្មានឧបទ្ទវហេតុអ្វីកើតឡើងឡើយ៕