(ព្រុចសែល)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានមានប្រសាសន៍នៅទីក្រុងព្រុចសែលកាលពីថ្ងៃអាទិត្យថា ខ្សែប្រយុទ្ធជួរមុខបច្ចុប្បន្ននៅក្នុងសង្គ្រាមរបស់ប្រទេសលោកប្រឆាំងនឹងរុស្ស៊ី គួរតែក្លាយជាមូលដ្ឋានសម្រាប់កិច្ចចរចាសន្តិភាព។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

លោក ហ្សេលេនស្គី បានបញ្ជាក់ថា «យើងត្រូវការការចរចាពិតប្រាកដ ដែលមានន័យថាយើងអាចចាប់ផ្តើមពីកន្លែងដែលខ្សែប្រយុទ្ធជួរមុខស្ថិតនៅពេលនេះ» ដោយលោកបានបន្ថែមថា មេដឹកនាំអឺរ៉ុបបានគាំទ្រជំហរនេះ។

ការថ្លែងរបស់លោក ហ្សេលេនស្គី បានធ្វើឡើងមុនកិច្ចប្រជុំអនឡាញមួយជាមួយមេដឹកនាំអឺរ៉ុប និងមុនពេលលោកធ្វើដំណើរទៅកាន់ទីក្រុងវ៉ាស៊ីនតោន ដើម្បីជួបជាមួយលោក ដូណាល់ ត្រាំ បន្ទាប់ពីជំនួបកំពូលរបស់មេដឹកនាំអាមេរិករូបនេះ ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅរដ្ឋអាឡាស្កា កាលពីថ្ងៃសុក្រ។

លោក ហ្សេលេនស្គី បានបញ្ជាក់ជាថ្មីនូវជំហររបស់លោកថា វាចាំបាច់ណាស់ក្នុងការបង្កើតបទឈប់បាញ់មួយជាមុនសិន ទើបអាចចរចាលើកិច្ចព្រមព្រៀងចុងក្រោយបាន។ មេដឹកនាំអ៊ុយក្រែនរូបនេះបានមានប្រសាសន៍ថា «វាជារឿងសំខាន់ណាស់ដែលទីក្រុងវ៉ាស៊ីនតោននៅខាងយើង»។ លោកនឹងត្រូវបានអមដំណើរដោយសម្ព័ន្ធមិត្តអឺរ៉ុបមួយចំនួន សម្រាប់កិច្ចចរចានៅថ្ងៃចន្ទជាមួយលោក ត្រាំ។

ទន្ទឹមគ្នានេះ លោកបាននិយាយថា អ៊ុយក្រែនមិនទាន់បានដឹងពីការទាមទារទាំងអស់ដែលលោក ពូទីន បានធ្វើឡើងនៅក្នុងជំនួបជាមួយលោក ត្រាំ កាលពីថ្ងៃសុក្រនៅឡើយទេ។ លោកបានបន្ថែមថា ការពិនិត្យមើលការទាមទារទាំងនោះនឹងត្រូវការពេលវេលាយូរ ហើយវាមិនអាចធ្វើទៅបានឡើយនៅក្រោម «សម្ពាធនៃអាវុធ»៕