(កៀវ)៖ អាជ្ញាធរអ៊ុយក្រែន បាននិយាយកាលពីថ្ងៃអាទិត្យ ទី១៧ ខែសីហាថា រុស្ស៉ីបានវាយប្រហារតំបន់លំនៅដ្ឋានមួយ នៅក្នុងតំបន់ Kharkov ដោយប្រើប្រាស់មីស៉ីលបាលីស្ទីគ បណ្តាលឱ្យមនុស្ស ១១នាក់រងរបួស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

អភិបាលតំបន់ លោក Oleh Synehubov និយាយថា ក្នុងចំណោមអ្នករងរបួសនៅ Kharkiv ដែលជាទីក្រុងធំទីពីររបស់អ៊ុយក្រែន គឺមានក្មេងស្រីអាយុ ១៣ឆ្នាំម្នាក់។ តាមបណ្តាញតេឡេក្រាម សេវាសង្គ្រោះបន្ទាន់រដ្ឋបានលើកឡើងថា ទំហំនៃការផ្ទុះ បានបំបែកបង្អួចអគារផ្ទះល្វែងដែលស្ថិតនៅក្បែរនោះ ហើយអ្នកស្រុកមួយចំនួនត្រូវជម្លៀស។ នៅឯតំបន់ Sumy អាជ្ញាធរក៏បានឱ្យដឹងថា ស្ត្រីអាយុ ៥៧ឆ្នាំម្នាក់ត្រូវរបួស ក្នុងការវាយប្រហារដោយគ្រាប់បែកកំណត់គោលដៅរបស់រុស្ស៉ី មកលើតំបន់ភាគឦសានទីក្រុង Sumy ដោយបានបំផ្លាញផ្ទះប្រជាជនរាប់សិបខ្នង និងអគារស្ថាប័នអប់រំមួយផងដែរ។

គួរបញ្ជាក់ថា Reuters មិនអាចផ្ទៀងផ្ទាត់ដោយឯករាជ្យ អំពីប្រភេទអាវុធដែលរុស្ស៉ីប្រើប្រាស់នោះទេ ខណៈមិនទាន់មានការអត្ថាធិប្បាយពីទីក្រុងមួស្គូ។ ចាប់តាំងពីសង្រ្គាមផ្ទុះឡើង ភាគីទាំងពីរតែងបដិសេធការកំណត់គោលដៅលើជនស៉ីវិល៕