(មូស្គូ)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយជាមួយមេដឹកនាំបេឡារុស និងកាហ្សាក់ស្ថាន កាលពីថ្ងៃអាទិត្យកន្លងទៅនេះ ដើម្បីធ្វើបច្ចុប្បន្នភាពអំពីការជួបគ្នារវាងរូបលោក ជាមួយប្រធានាធិបតីអាមេរិក ដូណាល់ ត្រាំ ដែលវិមានក្រឹមឡាំងថា ជាជំហានដ៏សំខាន់មួយឆ្ពោះទៅរកសន្តិភាពនៅអ៊ុយក្រែន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១៨ ខែសីហា ឆ្នាំ ២០២៥។

បន្ទាប់ពីជួបលោក ត្រាំ នៅរដ្ឋ Alaska លោក​ ពូទីន បានប្រាប់ក្រុមមន្រ្តីកំពូលៗរបស់លោកនៅក្នុងវិមានក្រឹមឡាំងកាលពីថ្ងៃសៅរ៍ថា ជំនួបនោះគឺទាន់ពេល និងមានប្រយោជន៍ខ្លាំង ដោយមាននូវការជជែកអំពីការបិទបញ្ចប់សង្រ្គាមអ៊ុយក្រែន «ដោយឈរលើមូលដ្ឋានត្រឹមត្រូវ» ដើម្បីដោះស្រាយដើមហេតុនៃវិបត្តិ។

អ្នកនាំពាក្យរបស់លោក Alexander Lukashenko ប្រធានាធិបតីបេឡារុស បានឱ្យដឹងថា លោក ពូទីន បានប្រាប់ លោក Lukashenko ឱ្យបានយល់លម្អិតអំពីលទ្ធផលនៃជំនួប។ ចំណែកអ្នកនាំពាក្យរបស់ លោក Kassym-Jomart Tokaev ប្រធានាធិបតីកាហ្សាក់ស្ថាន និយាយថា ជំនួបរវាងលោក ពូទីន និងលោក ត្រាំ ជួយឱ្យភាគីអាមេរិកយល់ពីរុស្ស៉ីជាងមុន ជុំវិញ គោលជំហររបស់រុស្ស៉ីចំពោះអ៊ុយក្រែន។

គួរបញ្ជាក់ថា លោក ពូទីន និងលោក ត្រាំ បានជួបគ្នាផ្ទាល់លើកដំបូងក្នុងរយៈពេល ៤ឆ្នាំ កាលពីថ្ងៃសុក្រសប្តាហ៍មុន (ម៉ោងនៅវ៉ាស៉ីនតោន) និងជាលើកដំបូងរវាងប្រធានាធិបតីរុស្ស៉ី-អាមេរិក ចាប់តាំងពីសង្រ្គាមនៅអ៊ុយក្រែនផ្ទុះឡើង៕