(សិង្ហបុរី)៖ សិង្ហបុរី នឹងចាត់ទុកការជក់បារីអេឡិចត្រូនិក ឬ Vape ជាបញ្ហាគ្រឿងញៀន ហើយនឹងបង្កើនការអនុវត្តច្បាប់ ចំពោះបារីអេឡិចត្រូនិចដែលខុសច្បាប់ ប៉ុន្តែកំពុងរីករាលដាលកាន់តែខ្លាំងឡើង ក្នុងចំណោមយុវជននៅក្នុងប្រទេស។ នេះបើយោងតាមការចេញផ្សាយដោយសារព័ត៌មាន CNA នៅថ្ងៃចន្ទ ទី១៨ ខែសីហា ឆ្នាំ ២០២៥។

កាលពីថ្ងៃអាទិត្យ នាយករដ្ឋមន្រ្តី លោក Lawrence Wong បានគូសបញ្ជាក់ថា «មកដល់ពេលនេះ យើងបានដាក់ពិន័យច្រើនហើយ ចំពោះការជក់បារីអេឡិចត្រូនិក ប៉ុន្តែវានៅមិនទាន់គ្រប់គ្រាន់ទេ»។ ក្នុង​សុន្ទរកថា​នៃទិវា​ជាតិ ​​លោក Wong បានបន្ថែមថា «អាជ្ញាធរនឹងធ្វើការពិន័យយ៉ាងតឹងរ៉ឹង រួមទាំងការកាត់ទោសឱ្យជាប់ពន្ធនាគារ និងការដាក់ទោសធ្ងន់ធ្ងរថែមទៀត ចំពោះអ្នកលក់បារីអេឡិចត្រូនិក»។

តាមលោកនាយករដ្ឋមន្រ្តី ការជំរុញផ្នែកអប់រំសាធារណៈ ក៏នឹងត្រូវបង្កើនផងដែរ ដោយចាប់ផ្តើមនៅតាមសាលារៀន សាកលវិទ្យាល័យ និងក្នុងអំឡុងពេលផ្តល់សេវាជាតិ។ ការជក់គឺជាកង្វល់ដ៏ធំមួយ ដោយលោក Wong កត់សម្គាល់ថា ទោះបីជាត្រូវបានហាមឃាត់ក៏ដោយ ក៏នៅតែមានការលួចនាំចូលបារីអេឡិចត្រូនិក មកសិង្ហបុរី។

គួរបញ្ជាក់ថា នៅក្នុងបារីអេឡិចត្រូនិច គឺមានសារធាតុញៀន និងបង្កគ្រោះថ្នាក់ រួមទាំង etomidate ដែលជាថ្នាំស្ពឹក ដែលអាចមានគ្រោះថ្នាក់នៅពេលប្រើច្រើនលើសកំណត់៕