(ម៉ាឌ្រីដ)៖ អាកាសធាតុក្តៅ បានរារាំដកល់កិច្ចខិតខំប្រឹងប្រែងទប់ទល់នឹងភ្លើងឆេះព្រៃ ២០កន្លែងនៅទូទាំងប្រទេសអេស្ប៉ាញ កាលពីថ្ងៃអាទិត្យ ទី១៧ ខែសីហា និងនាំឱ្យរដ្ឋាភិបាលដាក់ពង្រាយកងទ័ពបន្ថែមចំនួន ៥០០នាក់ចេញពីអង្គភាពសង្រ្គោះបន្ទាន់យោធា ដើម្បីជួយពន្លត់ភ្លើងឆេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ទីភ្នាក់ងារអាកាសធាតុជាតិអេស្ប៉ាញ AEMET បានឱ្យដឹងថា សីតុណ្ហភាពអាចមានកម្រិត ៤៥អង្សាសេក្នុងតំបន់មួយចំនួន នៅថ្ងៃអាទិត្យ។ តំបន់ភាគពាយ័ព្យ Galicia ភ្លើងឆេះព្រៃច្រើនកន្លែងបង្កឱ្យមានផ្សែងខ្មួលខ្មាញ់ បង្ខំឱ្យបិទផ្លូវហាយវ៉ាយ និងសេវាកម្មរថភ្លើង។ ក្នុងសប្តាហ៍កន្លងទៅ ភ្លើងឆេះនៅទីនោះបានឆក់យកជីវិតមនុស្ស ៣នាក់ និងឆាបឆេះផ្ទៃដីជាង ១១៥ ០០០ហិកតា។

នាយករដ្ឋមន្រ្តីអេស្ប៉ាញ លោក Pedro Sanchez បានប្រកាសឱ្យដាក់ពង្រាយកងទ័ពបន្ថែមទៀត ដែលនាំឱ្យចំនួនសរុបនៃការដាក់ពង្រាយនៅ​ទូទាំង​ប្រទេស​កើនឡើងដល់​ ១ ៩០០​នាក់។ ប្រធានទីភ្នាក់ងារសង្រ្គោះបន្ទាន់តំបន់និយាយថា សីតុណ្ហភាពនឹងធ្លាក់ចុះវិញ ចាប់ពីថ្ងៃអង្គារ ប៉ុន្តែសម្រាប់ពេលនេះលក្ខខណ្ឌអាកាសធាតុ គឺអាក្រក់ខ្លាំងណាស់។

គួរបញ្ជាក់ថា ភាគខាងត្បូងនៃតំបន់អឺរ៉ុប កំពុងជួបប្រទះនូវរដូវកាលភ្លើងឆេះព្រៃដ៏អាក្រក់បំផុត មិនធ្លាប់មានក្នុងរយៈពេលពីរទសវត្សរ៍ ដោយអេស្ប៉ាញរងគ្រោះខ្លាំងជាងគេ។ ចំណែកព័រទុយហ្គាល់ ដែលជាប្រទេសជិតខាងអេស្ប៉ាញ ក៏កំពុងប្រយុទ្ធនឹងអណ្តាតភ្លើងរាលដាលផងដែរ៕