(ណៃពិដោ)៖ នៅថ្ងៃចន្ទ ទី១៨ ខែសីហា រដ្ឋាភិបាលយោធាមីយ៉ាន់ម៉ា បានប្រកាសថា ការបោះឆ្នោតសកលនឹងចាប់ផ្តើមប្រព្រឹត្តទៅ នៅថ្ងៃទី២៨ ខែធ្នូ ឆ្នាំ២០២៥។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

គណៈកម្មការរៀបចំការបោះឆ្នោតនៃប្រទេសមីយ៉ាន់ម៉ា ហៅកាត់ UEC បាននិយាយក្នុងសេចក្តីថ្លែងការណ៍ថា «ដំណាក់កាលទីមួយ នៃដំណើរការបោះឆ្នោតសកលសេរីពហុបក្ស នឹងចាប់ផ្តើមនៅថ្ងៃអាទិត្យ ទី២៨ ខែធ្នូ ឆ្នាំ២០២៥។ ចំណែក កាលបរិច្ឆេទសម្រាប់ដំណាក់កាលបន្ទាប់ទៀត នឹងត្រូវប្រកាសនាពេលក្រោយ»។ ក្នុងនេះ មេដឹកនាំរបបយោធា លោក Min Aung Hlaing ទើបតែបានបញ្ជាក់ថា ការបោះឆ្នោតសកល នឹងត្រូវរៀបចំឡើងនៅក្នុងចន្លោះខែធ្នូ ឆ្នាំ២០២៥ និង​ខែមករា ឆ្នាំ២០២៦។

គួរបញ្ជាក់ថា មីយ៉ាន់ម៉ាបាននិងកំពុងបន្តរងការហែកហួរ ដោយសារសង្រ្គាមស៉ីវិល ចាប់តាំងតែពីយោធាបានធ្វើរដ្ឋប្រហារផ្តួលរំលំ ​រដ្ឋាភិបាលស៉ីវិល របស់លោកស្រី អោងសាន ស៊ូជី កាលពីខែកុម្ភៈ ឆ្នាំ២០២១។ ពេលនេះទឹកដីមួយភាគធំនៃផ្ទៃប្រទេស គឺស្ថិតនៅក្រៅការគ្រប់គ្រងរបស់យោធា បន្ទាប់ពីត្រូវបានដណ្តើមកាន់កាប់ដោយក្រុមឧទ្ទាម និងក្រុមប្រដាប់អាវុធជនជាតិភាគតិចដ៏មានឥទ្ធិពល ហើយក្រុមទាំងនោះបានប្តេជ្ញាថា នឹងរារាំងមិនឱ្យការបោះឆ្នោតអាចធ្វើឡើង នៅក្នុងតំបន់គ្រប់គ្រងរបស់ពួកគេឡើយ។

របបសឹកបានអះអាងថា គម្រោងរៀបចំការបោះឆ្នោតសកលរបស់ខ្លួន គឺជាមធ្យោបាយប្រសើរជាងគេ ដើម្បីបញ្ចប់ជម្លោះក្នុងប្រទេស ប៉ុន្តែស្របពេលដែលលោកស្រី ស៊ូជី នៅបន្តជាប់ក្នុងពន្ធនាគារ ហើយគណបក្សប្រឆាំងនានា ត្រូវបានហាមឃាត់ ឬប្រកាសធ្វើពហិការ​ចូលរួម ក្រុមអ្នកសង្កេតការណ៍អន្តរជាតិ បានរិះគន់ថា ការបោះឆ្នោតនោះ គ្រាន់តែជាការបោះឆ្នោតក្លែងក្លាយ បង្កើតឡើងដើម្បីឱ្យក្រុមឧត្តមសេនីយ៍យោធា នៅរក្សាអំណាចរបស់ខ្លួនដោយស្របច្បាប់ប៉ុណ្ណោះ៕