(ប៉េកាំង)៖ នៅថ្ងៃចន្ទ ទី១៨ ខែសីហា ក្រសួងការបរទេសនៃទីក្រុងប៉េកាំង បាននិយាយថា តៃវ៉ាន់គឺជាបញ្ហាផ្ទៃក្នុងរបស់ប្រទេសចិន ដែលការលើកឡើងនេះ គឺជាការឆ្លើយតបចំពោះប្រធានាធិបតីសហរដ្ឋអាមេរិក លោក ដូណាល់ ត្រាំ ដែលបានអះអាងថា ប្រធានាធិបតីចិន លោក ស៉ី ជីនពីង បានប្រាប់រូបលោកផ្ទាល់ថា លោកនឹងមិនបើកការវាយប្រហារលើតៃវ៉ាន់នោះទេ ដរាបណាលោក ត្រាំ ជាប្រធានាធិបតីអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក ត្រាំ បានធ្វើការអត្ថាធិប្បាយដូចខាងលើ ក្នុងកិច្ចសម្ភាសមួយជាមួយបណ្តាញព័ត៌មានអាមេរិក Fox News កាលពីថ្ងៃសុក្រសប្តាហ៍មុន។ នៅពេលត្រូវបានសាកសួរអំពីសម្តីរបស់លោក ត្រាំ អ្នកនាំពាក្យក្រសួងការបរទេសចិន លោកស្រី Mao Ning បាននិយាយក្នុងសន្និសីទព័ត៌មានប្រចាំថ្ងៃថា តៃវ៉ាន់គឺជាផ្នែកមិនអាចកាត់ផ្តាច់បានដាច់ខាត នៃទឹកដីរបស់ប្រទេសចិន។

លោកស្រីអ្នកនាំពាក្យ បានសង្កត់ធ្ងន់យ៉ាងដូច្នេះថា «បញ្ហាតៃវ៉ាន់គឺជាកិច្ចការផ្ទៃក្នុងសុទ្ធសាធរបស់ចិន ហើយរបៀបដោះស្រាយ​បញ្ហាតៃវ៉ាន់ គឺជារឿងរបស់ប្រជាជនចិន។ យើងនឹងព្យាយាមឱ្យអស់ពីសមត្ថភាព សម្រាប់លទ្ធភាពនៃការបង្រួបង្រួមគ្នាដោយសន្តិវិធី។ ប៉ុន្តែយើងនឹងមិនអាចដាច់ខាតអនុញ្ញាតឱ្យ អ្នកណាម្នាក់ឬកម្លាំងណាមួយ បំបែកតៃវ៉ាន់ចេញពីចិនបានឡើយ ទោះក្នុងលក្ខណៈណាក៏ដោយ»។

គួរបញ្ជាក់ថា សហរដ្ឋអាមេរិក គឺជាខ្នងបង្អែកអន្តរជាតិនិងជាអ្នកផ្គត់ផ្គង់អាវុធដ៏សំខាន់បំផុតរបស់តៃវ៉ាន់ បើទោះបីជាមិនមានទំនាក់ទំនងការទូតផ្លូវការនឹងគ្នាក្តី។ ចិនដែលមិនបោះបង់ចោល នូវលទ្ធភាពនៃការប្រើប្រាស់យោធាដើម្បីគ្រប់គ្រងតៃវ៉ាន់ ជាទូទៅចាត់ទុកបញ្ហាកោះតៃវ៉ាន់ ជាប្រធានបទរសើបនិងសំខាន់ជាងគេ នៅក្នុងទំនាក់ទំនងរបស់ខ្លួនជាមួយសហរដ្ឋអាមេរិក៕