(កៀវ)៖ អាជ្ញាធរអ៊ុយក្រែនបានឱ្យដឹងនៅថ្ងៃចន្ទនេះថា មនុស្សយ៉ាងហោចណាស់ ៩នាក់បានស្លាប់ និង ៤០នាក់ផ្សេងទៀតបានរងរបួស នៅក្នុងការវាយប្រហាររបស់រុស្ស៊ីទៅលើទីក្រុង Kharkiv និងទីក្រុង Zaporizhzhia។ នេះបើតាមការចេញផ្សាយដោយទីភ្នាក់ងារសារព័ត៌មាន Xinhua នៅថ្ងៃទី១៨ ខែសីហា ឆ្នាំ២០២៥។

នៅទីក្រុង Kharkiv ដែលជាទីក្រុងធំទីពីររបស់អ៊ុយក្រែន ត្រូវបានដ្រូនប្រយុទ្ធប្រភេទ Shahed មួយគ្រឿង វាយប្រហារអគារលំនៅដ្ឋានដ៏ខ្ពស់មួយ ដោយបានសម្លាប់មនុស្ស ៦នាក់ និងបង្កឱ្យមានអ្នករងរបួស ២០នាក់ផ្សេងទៀត នេះបើយោងតាមអភិបាលក្រុង លោក Ihor Terekhov ដែលបានសរសេរនៅលើ Telegram។ ក្នុងចំណោមអ្នកស្លាប់ មានក្មេងស្រីអាយុមួយឆ្នាំម្នាក់ និងក្មេងប្រុសអាយុ ១៦ឆ្នាំម្នាក់ ខណៈដែលកុមារ ៦នាក់ស្ថិតក្នុងចំណោមអ្នករងរបួស។

ចំណែកឯនៅទីក្រុង Zaporizhzhia ភាគអាគ្នេយ៍ ការវាយប្រហាររបស់រុស្ស៊ីក៏បានសម្លាប់មនុស្ស ៣នាក់ និងធ្វើឱ្យ ២០នាក់ផ្សេងទៀតរងរបួស នេះបើតាមការបញ្ជាក់របស់អភិបាលតំបន់ លោក Ivan Fedorov។ លោកបានបន្ថែមថា អ្នករងរបួសជាច្រើននាក់ស្ថិតក្នុងស្ថានភាពធ្ងន់ធ្ងរ ខណៈដែលអគារលំនៅដ្ឋាន សហគ្រាសមួយកន្លែង ចំណតរថយន្តក្រុង និងទីតាំងពាណិជ្ជកម្មជាច្រើនត្រូវបានខូចខាត។

គួរបញ្ជាក់ថា កងទ័ពអាកាសអ៊ុយក្រែនបានរាយការណ៍ថា រុស្ស៊ីបានបាញ់ដ្រូនចំនួន ១៤០គ្រឿង និងមីស៊ីលបាលីស្ទិក Iskander-M ចំនួន ៤គ្រាប់ មកលើអ៊ុយក្រែនកាលពីយប់មិញ។ ក្នុងនោះ ដ្រូនចំនួន ៨៨គ្រឿងត្រូវបានបាញ់ទម្លាក់ ខណៈដែលគ្រាប់ផ្សេងទៀតបានវាយប្រហារគោលដៅនៅទីតាំងចំនួន ២៥កន្លែង ទូទាំងតំបន់ចំនួន ៦៕