(ហ្កាហ្សា)៖ ជនជាតិប៉ាឡេស្ទីនរាប់ពាន់នាក់ បានភៀសខ្លួនចេញពីផ្ទះសម្បែងរបស់ពួកគេនៅតំបន់ភាគខាងកើតនៃទីក្រុងហ្កាហ្សា ដែលកំពុងរងការទម្លាក់គ្រាប់បែកឥតឈប់ឈរពីសំណាក់អ៉ីស្រាអែល ខណៈដែលកងទ័ពអ៉ីស្រាអែលត្រៀមបើកប្រតិបត្តិការវាយលុកទ្រង់ទ្រាយធំ។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

ផែនការរបស់អ៉ីស្រាអែលក្នុងការដណ្តើមគ្រប់គ្រងទីក្រុងហ្កាហ្សា ដែលនាយករដ្ឋមន្ត្រី Benjamin Netanyahu បានចាត់ទុកថាជា «បន្ទាយធំចុងក្រោយរបស់ក្រុមហាម៉ាស» បានបង្កឱ្យមានការព្រួយបារម្ភទាំងក្នុង និងក្រៅប្រទេស។ ស្របពេលជាមួយគ្នានេះ ក្រុមអ្នកសម្រុះសម្រួលអេហ្ស៊ីប និងកាតា កំពុងបង្កើនកិច្ចខិតខំប្រឹងប្រែង ដែលប្រភពមួយបានចាត់ទុកថាជា «ការប៉ុនប៉ងចុងក្រោយ» ដើម្បីឈានដល់បទឈប់បាញ់។

អ្នកជំនួញម្នាក់នៅទីក្រុងហ្កាហ្សា លោក Tamer Burai បាននិយាយថា «ប្រជាជននៅទីក្រុងហ្កាហ្សា ប្រៀបដូចជាអ្នកដែលត្រូវបានកាត់ទោសប្រហារជីវិត ហើយកំពុងរង់ចាំការប្រហារ»។ លោកបានបន្ថែមថា លោកកំពុងជម្លៀសគ្រួសាររបស់លោកទៅកាន់ភាគខាងត្បូង។ ស្របពេលជាមួយគ្នានេះ ប្រជាជនប៉ាឡេស្ទីនជាច្រើនក៏បានអំពាវនាវឱ្យមានការតវ៉ាប្រឆាំងនឹងក្រុមហាម៉ាស ដើម្បីជំរុញឱ្យក្រុមនេះបង្កើនកិច្ចចរចា និងបញ្ចៀសការវាយលុករបស់អ៉ីស្រាអែល។

គួរបញ្ជាក់ថា កិច្ចចរចាដោយប្រយោលជុំចុងក្រោយបានបញ្ចប់ទៅដោយភាពជាប់គាំង។ ប្រភពដែលនៅជិតស្និទ្ធនឹងកិច្ចចរចានៅទីក្រុងគែរ បានឱ្យដឹងថា ក្រុមហាម៉ាសបានប្រាប់ក្រុមអ្នកសម្រុះសម្រួលថា ខ្លួនត្រៀមខ្លួនជាស្រេចដើម្បីបន្តការពិភាក្សាអំពីបទឈប់បាញ់រយៈពេល ៦០ថ្ងៃ និងការដោះលែងចំណាប់ខ្មាំងពាក់កណ្តាល ប៉ុន្តែក្រុមនេះក៏ចង់បានកិច្ចព្រមព្រៀងដ៏ទូលំទូលាយមួយ ដែលនឹងបញ្ចប់សង្គ្រាមទាំងស្រុងផងដែរ៕