(វ៉ាស៉ីនតោន)៖ កាលពីថ្ងៃចន្ទ ទី១៨ ខែសីហា កងទ័ពអាកាសរបស់សហរដ្ឋអាមេរិក បានប្រកាសឱ្យដឹងថា ឧត្តមសេនីយ៍ David Allvin នឹងចូលនិវត្តន៍មុនពេលកំណត់ ក្រោយកាន់តំណែងបានត្រឹម ២ឆ្នាំ ពោលគឺពាក់កណ្តាលនៃអាណត្តិរបស់លោក ដែលមានរយៈពេល៤ឆ្នាំ ក្នុងនាមជាអគ្គសេនាធិការកងទ័ពអាកាសអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

កងទ័ពអាកាសអាមេរិក មិនបានផ្តល់ហេតុផលនៅពីក្រោយការលាលែងពីតួនាទីមុនអាណត្តិបែបនេះ របស់លោក Allvin ឡើយ ក៏ប៉ុន្តែគេសង្កេតឃើញថា កន្លងមកនេះ មន្រ្តីយោធាជាន់ខ្ពស់អាមេរិកជាបន្តបន្ទាប់ ត្រូវបានបង្ខំឱ្យចុះចេញពីតំណែងដោយរដ្ឋបាល​ប្រធានាធិបតី លោក ដូណាល់ ត្រាំ ចាប់តាំងតែពីរូបលោក បានវិលត្រឡប់មកកាន់អំណាចសាជាថ្មី កាលពីដើមឆ្នាំនេះ។

បើតាមសេចក្តីប្រកាសរបស់កងទ័ពអាកាសអាមេរិក លោក Allvin នឹងលាលែងពីតំណេងជាផ្លូវការ នៅថ្ងៃទី១ ខែវិច្ឆិកា ឆ្នាំ២០២៥។ លោកឧត្តមសេនីយ៍ បានចូលកាន់តួនាទីជាប្រមុខកងទ័ពអាកាសអាមេរិក ចាប់តាំងពីខែវិច្ឆិកា ឆ្នាំ២០២៣។

គួរបញ្ជាក់ថា ចាប់តាំងពីដើមអាណត្តិទី២របស់លោក ត្រាំ កាលពីខែមករា ឆ្នាំនេះ មន្រ្តីយោធាជាន់ខ្ពស់ជាច្រើនរូប ដែលបានចាកចេញ​ពីតំណែង រួមមានដូចជា នាយអគ្គសេនាធិការចម្រុះរបស់យោធាអាមេរិក លោក Charles CQ Brown ដែលត្រូវបានបណ្តេញ កាលពីខែកុម្ភៈ ព្រមទាំងប្រមុខកងទ័ពជើងទឹក ប្រមុខកងឆ្មាំសមុទ្រ អគ្គសេនាធិការរងកងទ័ពអាកាស និងតំណាងយោធាប្រចាំ NATO ជាដើម៕