(វ៉ាស៉ីនតោន)៖ កាលពីថ្ងៃចន្ទ ទី១៨ ខែសីហា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា រូបលោកមានឆន្ទៈជួបផ្ទាល់ជាមួយប្រធានាធិបតីរុស្ស៉ី លោក វ៉្លាឌីមៀ ពូទីន ដើម្បីចរចាបញ្ចប់សង្រ្គាមរវាងប្រទេសទាំងពីរ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ថ្លែងប្រាប់ក្រុមអ្នកសារព័ត៌មាន ក្រោយជំនួបពិភាក្សាជាមួយប្រធានាធិបតីអាមេរិក លោក ដូណាល់ ត្រាំ និងក្រុមមេដឹកនាំអឺរ៉ុប នៅឯសេតវិមាន លោក ហ្សេលេនស្គី បាននិយាយថា រូបលោកត្រៀមខ្លួនជាស្រេចដើម្បីជួបលោក ពូទីន ខណៈបើកើតមានឡើង វានឹងជាជំនួបតទល់លើកដំបូងរបស់លោក ជាមួយលោកប្រធានាធិបតីរុស្ស៉ី គិតចាប់តាំងពីទីក្រុងមូស្គូ បានបើកការឈ្លានពានលើ​អ៊ុយក្រែន កាលពីខែកុម្ភៈ ឆ្នាំ២០២២។ កាលពីថ្ងៃសុក្រសប្តាហ៍មុន លោក ត្រាំ បានទទួលស្វាគមន៍លោក ពូទីន នៅរដ្ឋ Alaska ដើម្បីបើកកិច្ចពិភាក្សាកំពូល អំពីអ៊ុយក្រែន។

លោក ហ្សេលេនស្គី បានស្ថិតក្រោមសម្ពាធកាន់តែខ្លាំង ក្នុងការធ្វើសម្បទានទឹកដី ដើម្បីបិទបញ្ចប់សង្រ្គាមអូសបន្លាយជាមួយ​រុស្ស៉ី ស្របពេលដែលកងកម្លាំងរបស់រុស្ស៉ី បន្តទទួលបានភាពរីកចម្រើននៅលើសមរភូមិ។ មុនកិច្ចប្រជុំនៅសេតវិមាន លោក ត្រាំ បានជំរុញឱ្យ​អ៊ុយក្រែនបោះបង់គំនិតចង់យកឧបទ្វីបគ្រីមៀមកវិញ និងគោលបំណងចូលជាសមាជិកអង្គការ NATO ខណៈចំណុចទាំងពីរនេះ សុទ្ធតែជាលក្ខខណ្ឌទាមទារសំខាន់របស់លោក ពូទីន។

យ៉ាងណាមិញ បើតាមប្រធានាធិបតីបារាំង លោក Emmanuel Macron ដែលមានវត្តមានក្នុងកិច្ចប្រជុំនៅសេតវិមានដែរនោះ ជំនួបពិភាក្សាកំពូលជាមួយលោក ត្រាំ គឺបានផ្តោតលើរបៀបរៀបចំការធានាសន្តិសុខសម្រាប់អ៊ុយក្រែន ក្នុងករណីសម្រេចបានកិច្ចព្រមព្រៀងសន្តិភាព ជាជាងការធ្វើសម្បទានទឹកដីពីអ៊ុយក្រែន។ លោក ត្រាំ បាននិយាយថា ការធានាសន្តិសុខ នឹងត្រូវទទួលបន្ទុកដោយក្រុមប្រទេសអឺរ៉ុប ក្រោមកិច្ចសហការជាមួយសហរដ្ឋអាមេរិក។ តាមលោក ហ្សេលេនស្គី ផែនការធានាសន្តិសុខ ទំនងនឹងសម្រេចចេញជាផ្លូវការ ក្នុងទម្រង់ណាមួយ នៅអំឡុងសប្តាហ៍ក្រោយ ឬក៏១០ថ្ងៃទៀត៕