(វ៉ាស៉ីនតោន)៖ មន្រ្តីអាមេរិកបានប្រាប់ Reuters កាលពីថ្ងៃចន្ទសប្តាហ៍នេះថា នាវាចម្បាំងបំពាក់មីស៉ីល Aegis របស់សហរដ្ឋអាមេរិកចំនួន ៣គ្រឿងនឹងទៅដល់ក្បែរឆ្នេរសមុទ្រវ៉េណេស៊ុយអេឡា ក្នុងរយៈពេល ៣៦ម៉ោងខាងមុខ ដែលជាផ្នែកមួយនៃកិច្ចខិតខំប្រឹងប្រែង ដោះស្រាយការគំរាមកំហែងពីក្រុមជួញដូរគ្រឿងញៀននៅប្រទេសអាមេរិកឡាទីនមួយនេះ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៩ ខែសីហា ឆ្នាំ ២០២៥។

ប្រធានាធិបតី លោក ដូណាល់ ត្រាំ ចង់ប្រើកម្លាំងយោធាដើម្បីតាមចាប់ក្រុមឧក្រិដ្ឋជនគ្រឿងញៀន ដែលត្រូវបានចាត់តាំងជា អង្គការភេរវករពិភពលោក។ មន្ត្រីអាមេរិកម្នាក់និយាយថា នាវិក និងកងម៉ារីនប្រហែល ៤ ០០០នាក់ ត្រូវបានគេរំពឹងថា នឹងប្តេជ្ញាអនុវត្តកិច្ចខិតខំប្រឹងប្រែងរបស់រដ្ឋបាល លោក ត្រាំ នៅក្នុងតំបន់ការាបៀនភាគខាងត្បូង។

មន្ត្រីរូបនេះបន្ថែមថា សមត្ថភាពនៃកងនាវានេះក៏នឹងរួមបញ្ចូលនូវយន្តហោះចារកម្ម P-8 ច្រើនគ្រឿង នាវាចម្បាំង និងនាវាមុជទឹកផងដែរ។ ដំណើរការត្រូវប្រេីពេលច្រេីនខែ ហើយតាមផែនការគឺធ្វេីប្រតិបត្តិការនៅក្នុងដែនអាកាសអន្តរជាតិ និងដែនទឹកអន្តរជាតិ។ ជុំវិញការលេីកឡេីងនេះ ក្រសួងទំនាក់ទំនងរបស់វ៉េណេស៊ុយអេឡា មិនទាន់ឆ្លេីយតបចំពោះសំណើសុំការអត្ថាធិប្បាយទេ៕