(វ៉ាស៉ីនតោន)៖ នៅឯរដ្ឋធានីវ៉ាស៉ីនតោន សហរដ្ឋអាមេរិក ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា លោកបើកចំហក្នុងការរៀបចំការបោះឆ្នោតនៅក្នុងប្រទេសរបស់លោក ប្រសិនបើសង្គ្រាមជាមួយរុស្ស៉ីឈានដល់ទីបញ្ចប់ ហើយវាមានសុវត្ថិភាពក្នុងការធ្វើដូច្នេះ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៩ ខែសីហា ឆ្នាំ ២០២៥។

នៅពេលត្រូវបានសួរអំពីឆន្ទៈក្នុងការរៀបចំការបោះឆ្នោត លោក ហ្សេលេនស្គី និយាយថា «ពិតណាស់ យើងបើកចំហសម្រាប់ការបោះឆ្នោត យើងត្រូវតែប្រាកដថាមានសុវត្ថិភាពក្នុងកាលៈទេសៈនោះ។ វាត្រូវការពេលបន្តិច យើងត្រូវធ្វើការក្នុងសភា ព្រោះអំឡុងពេលមានសង្រ្គាមមិនអាចគិតគូរឿងបោះឆ្នោតបាន»។ លោក បន្ថែមថា បទឈប់បាញ់ក្នុងសង្គ្រាមគឺត្រូវការជាចាំបាច់ ដើម្បីអាចឱ្យប្រជាជនអ៊ុយក្រែនចូលរួមក្នុងការបោះឆ្នោតបែបប្រជាធិបតេយ្យ បើកចំហ និងស្របច្បាប់។

គួរបញ្ជាក់ថា ដេីមឡេីយ អ៊ុយក្រែន ត្រូវរៀបចំការបោះឆ្នោតប្រធានាធិបតី នៅក្នុងឆ្នាំ ២០២៤ ប៉ុន្តែត្រូវបានផ្អាកដោយច្បាប់អាជ្ញាសឹក បន្ទាប់ពីមានការឈ្លានពានរបស់រុស្ស៉ី៕