(ហ្សេរុយសាឡឹម)៖ មន្ត្រីអ៉ីស្រាអែលពីរនាក់បានឱ្យដឹងនៅថ្ងៃអង្គារនេះថា អ៉ីស្រាអែលកំពុងសិក្សាការឆ្លើយតបរបស់ក្រុមហាម៉ាសទៅនឹងសំណើឈប់បាញ់មួយនៅតំបន់ហ្កាហ្សា ដែលជាកិច្ចព្រមព្រៀងដ៏មានសក្តានុពលមួយសម្រាប់បទឈប់បាញ់រយៈពេល ៦០ថ្ងៃ និងការដោះលែងចំណាប់ខ្មាំងអ៉ីស្រាអែលពាក់កណ្តាលដែលនៅសេសសល់។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

កិច្ចខិតខំប្រឹងប្រែងដើម្បីផ្អាកការប្រយុទ្ធគ្នា បានទទួលបានសន្ទុះថ្មីមួយ បន្ទាប់ពីអ៉ីស្រាអែលបានប្រកាសពីផែនការបើកប្រតិបត្តិការវាយលុកថ្មីមួយ ដើម្បីដណ្តើមគ្រប់គ្រងទីក្រុងហ្កាហ្សា។ ក្រុមអ្នកសម្រុះសម្រួលអេហ្ស៊ីប និងកាតា កំពុងជំរុញឱ្យមានការចាប់ផ្តើមកិច្ចចរចាដោយប្រយោលឡើងវិញ លើផែនការឈប់បាញ់ដែលគាំទ្រដោយសហរដ្ឋអាមេរិក។

យោងតាមមន្ត្រីហាម៉ាសម្នាក់ សំណើនេះរួមមានការដោះលែងអ្នកទោសប៉ាឡេស្ទីនចំនួន ២០០នាក់ រួមទាំងស្ត្រី និងអនីតិជនមួយចំនួន ជាថ្នូរនឹងការដោះលែងចំណាប់ខ្មាំងអ៉ីស្រាអែល ១០នាក់ដែលនៅរស់ និង ១៨នាក់ដែលបានស្លាប់។ ប្រភពសន្តិសុខអេហ្ស៊ីបពីរនាក់បានបញ្ជាក់ពីព័ត៌មានលម្អិតនេះ ហើយបានបន្ថែមថា ក្រុមហាម៉ាសក៏បានស្នើសុំឱ្យមានការដោះលែងអ្នកជាប់ឃុំប៉ាឡេស្ទីនរាប់រយនាក់បន្ថែមទៀតផងដែរ ដែលត្រូវបានចាប់ខ្លួនពីតំបន់ហ្កាហ្សា។

ទោះជាយ៉ាងណា នៅលើសមរភូមិ មិនទាន់មានសញ្ញាណាមួយបង្ហាញថាបទឈប់បាញ់ជិតឈានមកដល់នោះទេ ខណៈដែលការបាញ់ប្រហារ ការបាញ់ផ្លោងរថក្រោះ និងការវាយប្រហារតាមអាកាសរបស់អ៉ីស្រាអែល បានសម្លាប់ជនជាតិប៉ាឡេស្ទីនយ៉ាងហោចណាស់ ២០នាក់នៅថ្ងៃអង្គារនេះ នេះបើយោងតាមមន្ត្រីសុខាភិបាលហ្កាហ្សា។

គួរបញ្ជាក់ថា កិច្ចចរចាដោយប្រយោលជុំចុងក្រោយបានបញ្ចប់ទៅដោយភាពជាប់គាំងកាលពីខែកក្កដា។ ផែនការរបស់អ៉ីស្រាអែលក្នុងការដណ្តើមគ្រប់គ្រងទីក្រុងហ្កាហ្សា បានបង្កឱ្យមានការព្រួយបារម្ភយ៉ាងខ្លាំងនៅឆាកអន្តរជាតិ និងក្នុងចំណោមប្រជាជនប្រមាណមួយលាននាក់ដែលកំពុងរស់នៅក្នុងទីក្រុងនោះ៕